Mbreti i Jordanisë, Abdullah II, deklaroi të hënën se ambiciet ekspansioniste të Izraelit përbëjnë kërcënimin më të madh për të ardhmen e rajonit, duke theksuar se siguria dhe stabiliteti rajonal nuk mund të arrihen pa u njohur palestinezëve të drejtat mbi tokën e tyre.

“Ambiciet ekspansioniste të Izraelit mbeten kërcënimi më i madh për të ardhmen e rajonit dhe shpresat e tij”, tha Abdullah në një fjalim drejtuar parlamentit.

Ai iu referua katastrofës së vazhdueshme humanitare në Rripin e Gazës dhe sulmeve izraelite në Bregun Perëndimor të pushtuar, përfshirë Kudsin Lindor, pavarësisht thirrjeve ndërkombëtare për ndalimin e shkeljeve izraelite.

Mbreti theksoi se në rajon nuk mund të ketë siguri dhe stabilitet pa njohjen e të drejtave të popullit palestinez mbi tokën e tij.

“Ata që besojnë se tirania sjell legjitimitet, gabohen, ashtu siç gabohen ata që mendojnë se koha e fshin të vërtetën”, tha mbreti.

Ai rikonfirmoi përkushtimin e Jordanisë ndaj parimeve të saj, identitetit arab dhe mbrojtjes së çështjeve arabe, duke u zotuar se do ta vazhdojë këtë qëndrim, ashtu siç kishte bërë babai i tij para tij dhe siç do të bëjë edhe i biri pas tij.

Mbreti theksoi gjithashtu se arritja e një qëndrimi të përbashkët arab do të mbetet përparësi për Jordaninë.

Izraeli po zhvillon një luftë gjenocidale në Gaza që nga tetori i vitit 2023, duke vrarë më shumë se 74.000 palestinezë dhe duke plagosur mbi 175.000 të tjerë, shumica gra dhe fëmijë.

Operacionet ushtarake izraelite dhe sulmet e kolonëve të paligjshëm janë intensifikuar gjithashtu në Bregun Perëndimor të pushtuar, përfshirë Kudsin Lindor.