Rusia dhe Ukraina të dielën akuzuan njëra-tjetrën për vrasjen e civilëve në sulmet ajrore gjatë natës.

Në rajonin e Odesës në Ukrainë, dy persona u vranë dhe pesë të tjerë u plagosën nga sulmet ruse, tha në Telegram kreu i administratës ushtarake rajonale, Oleh Kiper.

“Armiku vazhdon ta godasë infrastrukturën civile dhe portuale të rajonit të Odesës. Fatkeqësisht, dy persona u vranë dhe pesë të tjerë u plagosën”, tha ai.

Në një deklaratë të veçantë në Telegram, presidenti ukrainas Volodymyr Zelenskyy tha se Kievi kishte goditur dy tankerë nafte në portin rus të Novorossiysk.

“Ushtarët tanë vazhdojnë të zbatojnë sanksione ndaj flotës së fshehtë të naftës së Rusisë, ata goditën dy anije të tilla në zonën ujore të hyrjes në portin e Novorossiysk”, shkroi ai.

Ndërkohë, guvernatori i rajonit të Moskës, Andrey Vorobyov, tha se një burrë u vra në një sulm me dron nga Ukraina.

“Sot, mbi rajonin e Moskës, forcat e mbrojtjes ajrore dhe mjetet e luftës elektronike rrëzuan 6 dronë armik”, tha ai. “Fatkeqësisht, në fshatin Chernevo në distriktin Volokolamsk, një burrë 77-vjeçar u vra”.

Po ashtu, guvernatori i rajonit Smolensk të Rusisë, Vasily Anokhin, tha në platformën ruse të mediave sociale Max se dy të rritur dhe një fëmijë u plagosën në një sulm me dron nga Ukraina.

Verifikimi i pavarur i pretendimeve nga secila palë mbetet i pamundur për shkak të konfliktit në vazhdim.