Presidenti amerikan, Donald Trump, deklaroi të shtunën se anuloi një sulm ushtarak të planifikuar kundër Iranit, pasi Teherani dhe “vende të tjera të Lindjes së Mesme” kërkuan kohë për ta finalizuar kornizën e një marrëveshjeje paqeje. Ai tha se edhe Izraeli i është bashkuar këtij angazhimi.
Në një postim në platformën Truth Social, Trump pretendoi se palët kishin rënë dakord për “parametrat” e një marrëveshjeje të mundshme. Sipas tij, ajo do të përfshinte rihapjen “e menjëhershme, të plotë dhe tërësore” të Ngushticës së Hormuzit dhe eliminimin e kërcënimit bërthamor të Iranit.
Trump tha se pranoi ta anulonte sulmin “për të mirën e ardhshme të BOTËS dhe, po ashtu, për mbijetesën e një Irani të suksesshëm dhe të begatë”, duke shtuar se vendimi varet nga aftësia e palëve për të arritur “me shpejtësi një MARRËVESHJE”.
“ShBA-ja është plotësisht e përgatitur dhe e gatshme të veprojë kundër Republikës Islamike të Iranit, me nivele terrori ushtarak, force dhe fuqie të papara që nga Lufta e Dytë Botërore”, shkroi Trump.
Ai tha se edhe Izraeli kishte rënë dakord të përmbahej nga sulmet.
“Të gjithë t’i përvishen punës dhe TA PËRFUNDOJNË”, deklaroi Trump.
