Banka e Amerikës ka rënë dakord të paguajë 72.5 milionë dollarë për të mbijetuarit e rrjetit të trafikimit seksual të Jeffrey Epsteinit, të cilët pretendojnë se banka ka lehtësuar dhe përfituar nga aktivitetet e tij kriminale.
Sipas raportimit të NBC News, gjykatësi federal i ShBA-së, Jed Rakoff, i cili mbikëqyr çështjen, pritet të mbajë një seancë në prill për të vendosur nëse do ta miratojë marrëveshjen.
Padia, e ngritur vitin e kaluar, pretendon se banka e dytë më e madhe në ShBA i ka ofruar shërbime financiare Epsteinit dhe rrjetit të tij, përfshirë llogari të përdorura nga viktimat dhe bashkëpunëtorët e tij, si Ghislaine Maxwell dhe Leon Black, ish-drejtorit ekzekutiv i Apollo Global Management.
“Teksa qëndrojmë pas deklaratave tona të mëparshme në këtë çështje, përfshirë se Banka e Amerikës nuk ka lehtësuar krimet e trafikimit seksual, kjo zgjidhje na lejon ta lëmë këtë çështje pas dhe të ofrojmë një mbyllje të mëtejshme për paditësit”, tha një zëdhënës i bankës për NBC News.
Sipas avokatëve, marrëveshja nuk kërkon që Banka e Amerikës të pranojë përgjegjësi. Ajo mbulon të gjitha gratë e abuzuara seksualisht ose të trafikuara nga Jeffrey Epsteini ose bashkëpunëtorët e rrjetit të tij ndërmjet 30 qershorit 2008 dhe 6 korrikut 2019, me të paktën 60 viktima të identifikuara.
Paditësit pretendojnë se banka nuk ka monitoruar siç duhet llogaritë dhe nuk ka raportuar në kohë aktivitetet e dyshimta, përfshirë 170 milionë dollarë nga llogaria e Leon Black, të shënuara si “këshillim për taksa dhe planifikim pasurie”, të cilat sipas tyre financuan operacionet e trafikimit të Epsteinit.
Leon Black, i konsideruar një “dëshmitar kyç” nga avokatja e viktimave Sigrid McCawley, ishte planifikuar të jepte dëshmi këtë muaj, por nuk u paraqit pas njoftimit për marrëveshjen. Black nuk është i paditur në këtë çështje dhe ka mohuar çdo përfshirje në krimet e Epsteinit.
Të mbijetuarit kanë arritur gjithashtu marrëveshje të ngjashme me JPMorgan Chase dhe Deutsche Bank, duke përfituar përkatësisht 290 milionë dhe 75 milionë dollarë.
