UEFA kritikoi të martën një plan të raportuar të presidentit të FIFA-s, Gianni Infantino, për t’u shitur investitorëve privatë pjesë pronësie në Kupën e Botës, duke theksuar se qeverisja e futbollit “nuk i përket FIFA-s për ta shitur”.
Gazeta britanike “The Times” raportoi se Infantino po planifikonte t’u shiste investitorëve privatë aksione në turne. Sipas raportimit, ai kishte zhvilluar bisedime me investitorë të afërt me administratën e presidentit amerikan Donald Trump, ndërsa kjo lëvizje mund të kishte ndikim “shkatërrues” mbi futbollin.
Secila prej 211 federatave anëtare të FIFA-s pritet të përfitonte një pjesë me vlerë rreth 15 milionë paundë, ose 20 milionë dollarë. Federatat do të mund ta mbanin pjesën e tyre ose ta shisnin për të siguruar të ardhura.
Duke iu referuar burimeve, gazeta raportoi gjithashtu se Infantino po përgatitej ta drejtonte kompaninë në rolin e komisionerit pas përfundimit të mandatit të fundit si president i FIFA-s.
Ai pritet të rizgjidhet pa kundërkandidat dhe të qëndrojë në krye të organizatës deri në vitin 2031.
UEFA deklaroi se plani i raportuar kapërcen “një vijë që institucionet drejtuese të futbollit nuk duhet ta kalojnë kurrë”.
“UEFA e merr këtë çështje jashtëzakonisht seriozisht. Të njëjtën gjë duhet të bëjë çdo federatë kombëtare e futbollit dhe çdo palë e interesuar: ligat, klubet, lojtarët, tifozët, qeveritë dhe të gjithë ata që shqetësohen për të ardhmen e lojës”, thuhet në reagim.
“Shpirti dhe qeverisja e futbollit nuk janë pasuri që mund të tregtohen, veçanërisht kur mungon plotësisht transparenca se kush përfiton financiarisht. Askush prej nesh nuk është pronar i futbollit. Ai nuk i përket FIFA-s për ta shitur”, shtoi UEFA.
