Prishtinë, ndizen qirinj në kujtim të viktimave të Masakrës së Reçakut

Me rastin e 15 janarit - Ditës së Masakrës së Reçakut, në sheshin “Skënderbeu” në Prishtinë janë ndezur qirinj në shenjë kujtimi dhe nderimi për viktimat.

Dhjetëra qytetarë u mblodhën pranë bustit të Gjergj Kastriotit–Skënderbeut, ku ndezën qirinj duke përkujtuar njërën nga ngjarjet më të rënda të luftës në Kosovë.

Aktiviteti u zhvillua në mënyrë simbolike, si thirrje për drejtësi dhe për të mos i harruar krimet e kryera në Reçak.

Më 15 janar të vitit 1999, në Reçak të Komunës së Shtimës, forcat serbe vranë 45 civilë, burra, gra, fëmijë dhe pleq. Masakrës i dha zë në botë ish-shefi i Misionit Verifikues të OSBE-së, në Kosovë, ambasadori William Walker, i cili e cilësoi për herë të parë këtë masakër si “krim kundër njerëzimit”.

Ngjarja e rëndë në Reçak nxiti reagimin e ndërkombëtarëve, ku NATO-ja vendosi t’i sulmojë caqet ushtarake e policore serbe.