Çmimi Nobel në Kimi për vitin 2025 iu dha sot tre shkencëtarëve, Susumu Kitagawa i Universiteti të Kiotos në Japoni, Richard Robson i Universitetit të Melburnit në Australi dhe Omar M. Yaghi i Universitetit të Kalifornisë, Berkeley, për punën e tyre pioniere në zhvillimin e strukturave metalo-organike, transmeton Anadolu.

Akademia Mbretërore Suedeze e Shkencave tha se tre laureatët zhvilluan struktura të reja molekulare me korniza të gjera që lejojnë molekulat të kalojnë, të njohura si struktura metalo-organike. Këto struktura mund të përdoren për të mbledhur ujë nga ajri i shkretëtirës, ​​për të pastruar ujin, për ta kapur dioksidin e karbonit dhe për ta ruajtur hidrogjenin.

"Strukturat metalo-organike kanë potencial të madh, duke sjellë mundësi të paparashikuara më parë për materiale të bëra me porosi me funksione të reja", tha kryetari i Komitetit Nobel për Kimi, Heiner Linke.

Çmimi në Kimi vitin e kaluar iu dha shkencëtarëve David Baker të Universitetit të Washingtonit (Seattle) dhe Demis Hassabis dhe John Jumper të "Google DeepMind" për përparime në projektimin kompjuterik të proteinave dhe parashikimin e strukturës së proteinave, duke avancuar mjekësinë dhe bioteknologjinë.

Çmimet Nobel, të themeluara në përputhje me testamentin e shpikësit suedez Alfred Nobel dhe të dhëna për herë të parë në vitin 1901, shihen si disa nga nderimet më prestigjioze në botë. Ato jepen çdo vit në fushat e fizikës, kimisë, fiziologjisë ose mjekësisë, letërsisë dhe paqes, me çmimin e ekonomisë të shtuar më vonë në vitin 1969 nga Banka Qendrore e Suedisë.

Që nga fillimi i tyre, çmimet Nobel janë pezulluar herë pas here, 49 herë, kryesisht gjatë Luftës së Parë Botërore dhe Luftës së Dytë Botërore. Çmimet gjithashtu nuk u dhanë në vitin 2020 dhe 2021 për shkak të pandemisë së COVID-19.

Laureatët do t'i marrin medaljet dhe diplomat e tyre në një ceremoni në Stokholm më 10 dhjetor, në përvjetorin e vdekjes së Alfred Nobelit.