Në Shqipëri vazhdojnë protestat antiqeveritare, mbi çështjen e projektit turistik në zonën e Zvërnecit në Qarkun e Vlorës dhe kundër ndërtimeve në zona të mbrojtura.

Në vend, por edhe në media të huaja, në javët e fundit ka pasur pretendime se projekti në zonën e Zvërnecit lidhet me Jared Kushner, dhëndrin e presidentit amerikan, Donald Trump, duke shkaktuar reagime dhe protesta në Tiranë, qytete të tjera të Shqipërisë dhe në diasporë.

Qytetarë dhe aktivistë janë mbledhur sërish sot në Tiranë në ditën e 38-të të protestës, duke kërkuar dorëheqjen e kryeministrit Edi Rama dhe krijimin e një qeverie teknike.

Protestuesit janë mbledhur në Sheshin “Skënderbeu”, për të vijuar drejt Bulevardit “Dëshmorët e Kombit” dhe para selisë së Kryeministrisë së Shqipërisë, me pankarta kundër qeverisë dhe kundër klasës politike në vend.

Ashtu si në protestat e mëparshme, pas qëndrimit disa orë në bulevard, protestuesit marshojnë në rrugët e kryeqytetit.

Të iniciuara nga aktivistë dhe të mbështetura nga qytetarët, protesta është zgjeruar edhe mbi çështje të tjera, si krijimi i një qeverie teknike, shfuqizimin e kuadrit ligjor që lidhet me investitorët strategjikë, shfuqizimin ligjit të njohur si "Paketa e Maleve" dhe anulimin e ndryshimeve në ligjin për zonat e mbrojtura.

Gjatë një proteste më 30 maj 2026 në zonën e Zvërnecit u shënuan incidente, ku sipas pamjeve të publikuara në rrjetet sociale, disa roje të një kompanie private të sigurisë tërhoqën zvarrë një qytetar, duke shkaktuar më pas fillimin e protestave në Tiranë.

Në lidhje me çështjen, kryeministri Rama ka deklaruar se projekti në Zvërnec po ndjek procedurat ligjore dhe mjedisore, duke shtuar se deri më tani nuk ka pasur një projekt përfundimtar apo studim të plotë të ndikimit në mjedis.