Një tornado ujore shkatërroi një shkollë në Sicilinë perëndimore të premten, ndërsa moti i keq goditi disa pjesë të Italisë, duke shkaktuar lëndime, përmbytje dhe dëme të mëdha materiale, raportoi agjencia ANSA.
Dy tornado ujore u formuan në det dhe lëvizën drejt tokës në zonat përreth Marsalës dhe Trapanit, duke dëmtuar ndërtesa, automjete dhe të mbjella.
Njëra prej tyre goditi kompleksin Terrenove të shkollës “Alcide De Gasperi” në Marsala, ku ndodheshin 273 fëmijë.
Drejtori i shkollës, Leonardo Gullotta, tha se personeli i zhvendosi fëmijët në një zonë më të sigurt brenda ndërtesës, pasi dalja jashtë ishte e pamundur.
“Një tornado ujore goditi drejtpërdrejt degën Terrenove dhe e shkatërroi plotësisht atë”, tha ai.
“Për fat të mirë, nuk pati të lënduar mes personelit dhe, mbi të gjitha, mes fëmijëve – vetëm disa gërvishtje”, shtoi Gullotta.
Disa persona u lënduan në zonën e prekur. Në Petrosino, një qytet në afërsi, dy persona u shtruan në spital pasi një automjet u hodh në një greminë.
Në rajonet e Lazios dhe Kampanias ishin në fuqi alarmet portokalli për shkak të rrezikut nga reshjet e rrëmbyeshme.
Përmbytjet goditën lagje në Napoli, ndërsa një mur i një supermarketi u shemb në Pozzuoli, pranë qytetit, dhe ndërprerjet e energjisë elektrike prekën disa pjesë të Maranos.
Në ishullin Iskia, reshjet e dendura shkaktuan përmbytje dhe rrëshqitje të dheut, duke bërë të nevojshme 13 ndërhyrje të zjarrfikësve. Një ndërprerje e shërbimeve të telekomunikacionit të enjten në mbrëmje pengoi shërbimet e internetit dhe telefonisë në gjithë ishullin për më shumë se dy orë, duke pamundësuar kryerjen e telefonatave emergjente.
Më në veri, një stuhi solli afro 100 milimetra reshje brenda pak orësh në Kastelione, në provincën e Kremonës, duke përmbytur rrugë dhe bodrume, si dhe duke rrëzuar pemë mbi automjete të parkuara.
