Kancelari gjerman Friedrich Merz u zotua për një bashkëpunim më të ngushtë në fushën e sigurisë dhe politikës së jashtme me Türkiyen, duke theksuar rolin kyç të Ankarasë në ruajtjen e paqes dhe stabilitetit rajonal.

“E vlerësoj rolin e Türkiyes. Ajo është aleat kyç strategjik për ne në politikën e jashtme dhe të sigurisë”, u tha ai gazetarëve në Ankara në përfundim të samitit dyditor të NATO-s, të organizuar nga presidenti turk Recep Tayyip Erdoğan.

Merz e falënderoi Erdoğanin për organizimin me sukses të këtij takimi të nivelit të lartë dhe u tha gazetarëve se gjatë takimit dypalësh me presidentin turk, ata diskutuan thellimin e bashkëpunimit dhe shkëmbyen pikëpamje mbi çështjet urgjente rajonale dhe ndërkombëtare.

“Sapo i përsërita presidentit Erdoğan gjatë bisedës sonë se, vetëm duke e pasur parasysh pozicionin gjeostrategjik të Türkiyes, ne kemi një interes të madh për të punuar ngushtë me aleatin tonë në NATO dhe pikërisht këtë po bëjmë”, tha Merz.

Kancelari vlerësoi rolin e Türkiyes në promovimin e paqes dhe stabilitetit në një rajon të paqëndrueshëm dhe tha se Ankaraja ka dhënë “kontribut të jashtëzakonshëm” në stabilizimin rajonal.

“Ne e pranojmë se sukseset e arritura në Siri me shumë gjasa nuk do të ishin të mundura pa kontributin e presidentit turk”, theksoi Merz. Ai bëri të ditur se i ka kërkuar Erdoğanit të përdorë ndikimin e tij te presidenti rus Vladimir Putin për të ndihmuar në përfundimin e luftës në Ukrainë.

Merz shtoi se së shpejti do ta presë Erdoğanin në Berlin për raundin e radhës të konsultimeve ndërqeveritare gjermano-turke.