Netanyahu: Misioni i Izraelit kundër Hezbollahut nuk ka mbaruar pavarësisht armëpushimit me Libanin

Kryeministri izraelit Benjamin Netanyahu tha se “misioni” i Izraelit kundër Hezbollahut në Liban nuk ka përfunduar, pavarësisht një armëpushimi që hyri në fuqi më herët gjatë ditës. 

“Ka gjëra që planifikojmë të bëjmë lidhur me kërcënimin e mbetur të raketave dhe kërcënimin e dronëve, të cilat nuk do t’i detajoj”, tha Netanyahu në një deklaratë të transmetuar në televizion.

Duke adresuar kritikat e brendshme për rezultatin në frontin verior, Netanyahu tha se Izraeli ka arritur “suksese të jashtëzakonshme”.

“Për herë të parë, kemi vendosur një zonë të gjerë sigurie përgjatë gjithë kufirit verior”, tha ai, duke shtuar se zona shtrihet nga Libani përmes Lartësive të Golanit deri në malin Hermon (Xhebel al-Sheikh) dhe zonën e Jarmukut në Sirinë jugore.

Ai tha se kjo zonë tampon, të cilën ai e quajti “Linja e Verdhë”, synon të eliminojë kërcënimin e depërtimit të drejtpërdrejtë dhe zjarrit nga tanket, duke vënë në dukje se forcat izraelite janë të dislokuara përgjatë kësaj vije për t’u përballur me çdo kërcënim të menjëhershëm.

Netanyahu gjithashtu tha se armëpushimi u arrit me kërkesë të presidentit amerikan Donald Trump.

“Me kërkesën e tij, ne pranuam një armëpushim të përkohshëm në Liban për të lejuar një mundësi për një zgjidhje të kombinuar diplomatike dhe ushtarake me qeverinë libaneze”, tha ai.

Presidenti amerikan Donald Trump tha sot se Washingtoni po e pengon aktivisht Izraelin nga kryerja e sulmeve të tjera në Liban, ndërsa një armëpushim i brishtë hyri në fuqi.

Trump njoftoi të enjten një armëpushim dhjetëditor në Liban që filloi në mesnatë sipas kohës lokale në Tel Aviv dhe Bejrut.

Numri i të vdekurve nga sulmet izraelite në Liban që nga 2 marsi ka arritur në 2.294, ndërsa 7.544 persona janë plagosur, tha sot Ministria e Shëndetësisë e Libanit.