Jordania dhe Siria ranë dakord të martën vonë për krijimin e një komiteti të përbashkët të sigurisë, i cili do të hetojë sulmet ajrore jordaneze në jug të Sirisë, që shkaktuan viktima, si dhe do të forcojë koordinimin për mbrojtjen e civilëve dhe respektimin e sovranitetit sirian.
Marrëveshja u arrit pas një bisede telefonike mes ministrit të Jashtëm sirian, Asaad al-Shaibani, dhe homologut të tij jordanez, Ayman Safadi, sipas një deklarate të përbashkët.
Komiteti do të shqyrtojë hollësitë e sulmeve të së hënës dhe pasojat e tyre, si dhe do të zhvillojë mekanizma për shkëmbimin e informacioneve të inteligjencës dhe koordinimin në terren.
Sipas deklaratës, Safadi shprehu “keqardhje dhe pikëllim të thellë” për vdekjen e civilëve nga sulmet ajrore dhe i përcolli ngushëllime popullit sirian.
Ai tha se sulmet kishin në shënjestër pozicionet e organizatës terroriste DEASH (ISIS) dhe se ishin ndërmarrë mbi bazën e informacioneve të inteligjencës për kërcënime të konfirmuara dhe sulme të afërta kundër Jordanisë.
Safadi riafirmoi gjithashtu respektin e Jordanisë për sovranitetin dhe integritetin territorial të Sirisë, duke theksuar se siguria dhe stabiliteti i dy vendeve janë të ndërlidhura.
Dy ministrat theksuan nevojën për koordinim të drejtpërdrejtë në fushën e sigurisë, me qëllim përballimin e kërcënimeve të përbashkëta, mbrojtjen e civilëve dhe luftimin e kontrabandës ndërkufitare të armëve dhe drogës.
Shtatë persona u vranë dhe tre të tjerë u plagosën nga sulmet, raportoi herët të martën televizioni sirian Al-Ekhbariya, duke cituar Drejtorinë e Shëndetësisë në provincën Daraa.
Qeveria siriane deklaroi se operacioni ishte kryer pa koordinim paraprak me Damaskun. Ministria e Jashtme siriane njoftoi më pas se i kishte përcjellë Jordanisë kundërshtimet e saj.
Ushtria jordaneze njoftoi të hënën se kishte goditur pozicione të grupeve që, sipas saj, lidheshin me sulmin e së premtes ndaj personave që merrnin pjesë në një ceremoni zie në një kishë në fshatin Hamoud, në provincën jugore jordaneze të Karakut.
Sipas Drejtorisë së Sigurisë Publike të Jordanisë, në sulmin ndaj kishës u vranë nëntë persona.
