Kreu i Shoqatës së të Burgosurve Palestinezë, Abdullah al-Zaghari, bëri thirrje për “veprim efektiv ndërkombëtar” pas raportimeve se Izraeli ka nisur caktimin e një sektori për të burgosurit palestinezë të dënuar me vdekje, përfshirë një dhomë ekzekutimesh.

Izraeli mban rreth 9.400 të burgosur palestinezë, përfshirë 94 gra, mbi 350 fëmijë, 3.244 të burgosur administrativë dhe 1.320 persona që i klasifikon si “luftëtarë të paligjshëm”, sipas të dhënave palestineze.

Zaghari tha për Anadolu se kjo masë është pjesë e “vendosmërisë së vazhdueshme të sistemit të pushtimit izraelit” për ta kthyer nxitjen dhe legjislacionin e miratuar prej tij në masa konkrete që synojnë ekzekutimin e të burgosurve palestinezë.

Ai tha se përgatitjet për zbatimin e ligjit “racist” përbëjnë “krim kundër njerëzimit” dhe janë pjesë e përpjekjeve për t’i përdorur të burgosurit palestinezë “si mjet negociimi politik”.

Zaghari gjithashtu e bëri komunitetin ndërkombëtar përgjegjës për vazhdimin e praktikave të tilla, duke iu referuar “heshtjes ndërkombëtare” që i ka mundësuar Izraelit të vazhdojë masat e tij represive.

Zyra e ministrit izraelit të ekstremit të djathtë të Sigurisë Kombëtare, Itamar Ben-Gvir, tha të martën se po caktohet sektori i parë për të burgosurit palestinezë të dënuar me vdekje dhe se ai do të përfshijë një dhomë të posaçme për ekzekutime, sipas transmetuesit privat izraelit Kanali 24.

Sipas transmetuesit, Izraeli e ka zbatuar dënimin me vdekje më parë vetëm në vitin 1962, kur u ekzekutua zyrtari nazist Adolf Eichmann.

Në vitin 1948, Izraeli u themelua në territoret e pushtuara nga milicitë e armatosura sioniste, të cilat kryen masakra dhe zhvendosën të paktën 750.000 palestinezë. Izraeli më vonë pushtoi territoret e mbetura palestineze dhe ka refuzuar të tërhiqet prej tyre dhe të lejojë krijimin e një shteti palestinez, siç parashikohet në rezolutat e OKB-së.