Presidenti i Shqipërisë, Bajram Begaj, ka përkujtuar nëpërmjet një mesazhi masakrën e Reçakut në Kosovë.
“Sot përkujtojmë masakrën e Reçakut dhe nderojmë martirët e saj”, shkroi ai në rrjetet sociale, duke shtuar:
“Denoncimi i saj 27 vite më parë nga ambasadori William Walker ndërgjegjësoi komunitetin ndërkombëtar për gjenocidin që po ndodhte në Kosovë. Ndërgjegjësimi çoi në Konferencën e Rambujesë, ndërhyrjen e NATO-s, lirinë, shtetin e Kosovës që sot e gëzojmë bashkërisht”.
Duke theksuar se kjo masakër nuk mund të harrohet, Begaj vlerësoi: “Thirrja për drejtësi nuk mund të shuhet! Nderi martirëve! Mirënjohje aleatit tonë strategjik, SHBA-së!”.
Gjithsej 45 civilë shqiptarë u vranë dhe u masakruan më 15 janar 1999 në Reçak, nga forcat policore, ushtarake dhe paramilitare serbe në vendndodhje të ndryshme përreth fshatit.
