Hoxha dënon sulmet e fundit të Rusisë: Shqipëria rikonfirmon mbështetjen e palëkundur për Ukrainën

Ministri për Evropën dhe Punët e Jashtme i Shqipërisë, Ferit Hoxha, ka dënuar sulmet e fundit të Rusisë ndaj Ukrainës, duke theksuar se Shqipëria rikonfirmon mbështetjen e saj të palëkundur për Ukrainën dhe popullin e saj.

Në një reagim në rrjetet sociale, Hoxha ka theksuar se dënojnë në termat më të ashpër valën e fundit të sulmeve të Rusisë kundër Ukrainës, sipas tij, gjatë së cilës dronë dhe raketa goditën zona civile, "duke shkaktuar humbjen tragjike të jetëve të pafajshme, përfshirë fëmijë".

"Shprehim solidaritetin tonë për viktimat, të plagosurit dhe familjet e tyre, të cilët vazhdojnë të përballen me pasojat shkatërruese njerëzore të kësaj lufte të pajustifikueshme. Këto sulme të përsëritura dhe të vazhdueshme pa dallim kundër civilëve dhe infrastrukturës kritike janë të papranueshme dhe përbëjnë një shkelje të rëndë të së drejtës ndërkombëtare humanitare. Ato duhet të marrin fund menjëherë", është shprehur Hoxha.

Ai ka theksuar se Shqipëria rikonfirmon mbështetjen e saj të palëkundur për Ukrainën dhe popullin e saj. "Mbështetja e qëndrueshme ndërkombëtare për Ukrainën, rritja e presionit ndaj Rusisë për t’u dhënë fund këtyre sulmeve, si dhe garantimi i përgjegjësisë së plotë për të gjitha shkeljet e së drejtës ndërkombëtare, mbeten thelbësore për mbrojtjen e civilëve dhe për ruajtjen e paqes dhe sigurisë në Evropë", ka shtuar Hoxha.

Të paktën 16 persona janë vrarë dhe dhjetëra të tjerë janë plagosur në sulmet ajrore ruse gjatë natës që goditën kryeqytetin ukrainas Kiev si dhe rajonet Dnipropetrovsk dhe Odesa.