Arabia Saudite dhe Siria diskutojnë marrëdhëniet dypalëshe dhe zhvillimet rajonale

Princi i Kurorës së Arabisë Saudite, Mohammed bin Salman, mori një telefonatë të martën nga presidenti sirian Ahmad al-Sharaa, gjatë së cilës ata diskutuan marrëdhëniet dypalëshe dhe zhvillimet rajonale.

Sipas agjencisë shtetërore saudite SPA, të dy liderët shqyrtuan fushat e bashkëpunimit dypalësh dhe mundësitë për forcimin e lidhjeve në disa sektorë.

Ata diskutuan gjithashtu çështje me interes të përbashkët dhe përpjekjet e vazhdueshme për t’i përmirësuar sigurinë, stabilitetin dhe rimëkëmbjen ekonomike në Siri.

Sharaa e bëri Arabinë Saudite destinacionin e tij të parë të huaj në shkurt, pasi mori detyrën e presidentit. Në maj, princi i kurorës saudite priti në mbretëri një takim me Sharaan dhe presidentin amerikan Donald Trump.