Siria dhe Jordania nënshkruan sot 11 dokumente bashkëpunimi, përfshirë një memorandum për lidhjen hekurudhore, i cili do të hapë rrugën për krijimin e një korridori rajonal që do të lidhë Arabinë Saudite me Türkiyen përmes dy vendeve.

Ministri i Jashtëm i Sirisë, Asaad al-Shaibani, i njoftoi marrëveshjet në një konferencë të përbashkët për media me homologun e tij jordanez, Ayman Safadi, në Pallatin Tishreen në Damask. Al-Shaibani tha se sesioni i tretë i Këshillit të Lartë të Koordinimit Siri-Jordani filloi të dielën, me bisedime që përfshinë 19 sektorë ndërsa përfundoi sot me një takim ministror, bisedime dypalëshe dhe nënshkrimin e dokumenteve.

Marrëveshjet përfshijnë gjithashtu mbjelljen artificiale të reve në pellgun e lumit Jarmuk, sigurinë dhe furnizimin me ushqime, investimet, aviacionin civil, bursat dhe shkëmbimet akademike. Al-Shaibani tha se të dyja vendet ranë dakord të përmirësojnë pikëkalimin kufitar Jaber-Naseeb, duke mundësuar funksionimin e tij gjatë 24 orëve, me korsi të veçanta për kamionët dhe udhëtarët si dhe ndërlidhjen elektronike të sistemeve të tyre doganore.

Palët miratuan një projekt me vlerë 47 milionë dollarë për rehabilitimin e një autostrade që lidh dy vendet. Sipas tij, të dyja palët po shqyrtojnë mundësinë e krijimit të një qyteti të përbashkët ekonomik në kufi ndërsa diskutuan edhe modernizimin e zonës së tyre të tregtisë së lirë dhe aktivizimin e këshillit të përbashkët të biznesit.

Al-Shaibani shtoi se tregtia dypalëshe është trefishuar pothuajse brenda një viti, duke arritur në 330 milionë dollarë.

Hetim i përbashkët për incidentin në Deraa

Al-Shaibani tha se të dyja vendet kanë krijuar një “komitet të përbashkët hetimor të sigurisë dhe teknik” për të përcaktuar rrethanat e asaj që ndodhi në provincën jugore siriane të Deraas. Ai tha se po punohet për kompensimin e viktimave dhe adresimin e dëmeve të shkaktuara nga incidenti.

Më 26 tetor, ushtria jordaneze njoftoi se kishte kryer një operacion ajror kundër disa objektivave në juglindje të Sirisë, të cilat i cilësoi si të lidhura me grupe terroriste, në përgjigje të një sulmi ndaj një kishe në qytetin Hmud, në provincën Karak të Jordanisë.

Amani tha se operacioni ishte koordinuar me qeverinë siriane. Ndërkaq, Damasku deklaroi se sulmet goditën objektiva në Deraa pa koordinim paraprak, duke shkaktuar të vrarë dhe të plagosur. "Na vjen keq për vdekjen e civilëve në incidentin e Deraas dhe u shprehim ngushëllimet tona të sinqerta familjeve të tyre", tha Safadi.

Sipas tij, një komitet i sigurisë kishte rënë dakord të përcaktonte procedurat për koordinimin e përpjekjeve kundër terrorizmit. Safadi i cilësoi drogat si "kërcënim i përbashkët", me të cilin të dyja vendet po punojnë së bashku për t'u përballur.

Energjia dhe çështjet rajonale

Al-Shaibani tha se që nga janari, gazi natyror po furnizon centralet elektrike siriane përmes Jordanisë dhe se Siria është e gatshme të mundësojë tranzitin e gazit drejt Libanit, çështje kjo që u diskutua në një takim trepalësh në Bejrut.

Ai tha se të dyja vendet po shkëmbejnë të dhëna për burimet ujore përmes një platforme të përbashkët dhe kanë arritur një marrëveshje të re për shërbimet ajrore. Palët diskutuan furnizimin e Jordanisë me tepricat siriane të grurit dhe elbit si dhe ranë dakord për trajnimin e 1.450 punonjësve të administratës shtetërore siriane.

Ndërkohë, Safadi i bëri thirrje bashkësisë ndërkombëtare të ndërhyjë për të ndalur sulmet izraelite ndaj Sirisë, duke paralajmëruar përshkallëzim të mëtejshëm rajonal. Ai tha se Jordania do të vazhdojë ta mbështesë sigurinë, stabilitetin dhe rindërtimin e Sirisë.

Më 18 prill 2025, Siria dhe Jordania ranë dakord për krijimin e Këshillit të Lartë të Koordinimit, me synimin për të forcuar bashkëpunimin në disa sektorë, përfshirë energjinë, shëndetësinë, industrinë, tregtinë, transportin dhe bujqësinë.