Kosovë, fillon numërimi i votave të diasporës
Në Kosovë ka nisur sot numërimi i votave të diasporës nga zgjedhjet parlamentare të 28 dhjetorit, proces që po zhvillohet në Qendrën e Numërimit dhe Rezultateve. Sipas KQZ-së, gjatë ditës do të numërohen mbi 27 mijë fletëvotime të ardhura nga jashtë vendit. Ndërkohë vijon verifikimi i rezultateve dhe numërimi i votave për deputetë në disa komuna, ndërsa rezultatet preliminare tregojnë fitore të Lëvizjes Vetëvendosje.
Turkish Airlines do ta ndërtojë terminalin më të madh të mallrave në botë, me investim mbi 2,3 miliardë
Turkish Airlines njoftoi se do ta ndërtojë terminalin më të madh të ngarkesave në botë dhe një objekt për shërbimin e ushqimit në fluturim, me një investim mbi 2,3 miliardë dollarë. Ky projekt pritet të krijojë 26 mijë vende të reja pune dhe shërben si një hap i madh për zgjerimin e aktivitetit të kompanisë. Me seli në Istanbul, Turkish Airlines transporton aktualisht mbi 85 milionë pasagjerë dhe 2 milionë tonë ngarkesë në vit, dhe synon të bëhet një nga pesë linjat ajrore më të mira në botë deri në vitin 2033, me flotë avionësh që do të arrijë 813 njësi. Projekti përforcon pozicionin e Turkish Airlines si një aktor kryesor global në industrinë ajrore dhe një simbol të forcës ekonomike të Turkiyes.
Trump: ShBA-ja është e gatshme dhe e armatosur nëse Irani vret protestuesit
Presidenti amerikan, Donald Trump, paralajmëroi se ShBA-ja do të ndërhyjë nëse Irani vret protestuesit paqësorë, duke theksuar se vendi është i gatshëm dhe i armatosur për të vepruar. Protestat, që shpërthyen më 28 dhjetor në Teheran për shkak të zvlerësimit të rialit iranian dhe përkeqësimit të kushteve ekonomike, përhapën pakëz më vonë në qytete të tjera dhe shkaktuan viktima në Lordegan, Azna dhe Kuhdasht. Agjencia gjysmëzyrtare Fars raportoi për më shumë se 150 protestues të mbledhur në Lordegan, duke brohoritur slogane antiqeveritare dhe duke hedhur gurë në ndërtesa publike. Zyrtarët iranianë, përfshirë Presidentin Masoud Pezeshkian, pranojnë pakënaqësinë publike dhe përgjegjësinë për problemet ekonomike, duke theksuar se nuk duhet fajësuar për situatën aktorë të jashtëm si ShBA-ja.
Dhjetëra të vdekur dhe të lënduar gjatë natës së Vitit të Ri në mbarë Evropën
Gjatë natës së Vitit të Ri, dhjetëra persona humbën jetën dhe shumë të tjerë u lënduan në mbarë Evropën për shkak të zjarreve, aksidenteve me fishekzjarre dhe incidenteve të ndryshme. Ngjarja më tragjike ndodhi në Zvicër, ku një zjarr në barin “Constellation” në Crans-Montana shkaktoi rreth 40 viktima dhe 115 të lënduar, shumica rëndë. Në Poloni, dy persona humbën jetën nga zjarre në banesa, ndërsa mijëra incidente u regjistruan dhe mbi 100 persona u arrestuan për drejtim nën ndikim alkooli. Në Holandë aksidente me fishekzjarre shkaktuan vdekje dhe dëmtime materiale, ndërsa një zjarr në kishën historike “Vondelkerk” në Amsterdam shkatërroi pjesë të ndërtesës pa viktima. Në Gjermani dhe Belgjikë, u raportuan viktima dhe plagosje nga fishekzjarret, përfshirë edhe tre oficerë policie të lënduar në Bruksel, dhe dhjetëra të arrestuar për shkelje të urdhrave të policisë. Autoritetet po vazhdojnë hetimet dhe asistencën për shtetasit e prekur.
Dhe kjo është përmbledhja e lajmeve të përditshme nga TRT Balkan. Për më shumë na ndiqni në TRT BALKAN ALBANIAN