Vazhdojnë protestat antiqeveritare në Shqipëri
Partitë opozitare në Shqipëri vijojnë protestat antiqeveritare, duke kërkuar dorëheqjen e kryeministrit Edi Rama dhe zëvendëskryeministres Belinda Balluku.
Partia Demokratike organizoi protestën “Foltore” para Kryeministrisë, ku Sali Berisha theksoi nevojën për “kryengritje paqësore”. Ndërkohë, Partia Lëvizja Bashkë protestoi pranë Kuvendit kundër korrupsionit dhe varfërisë, duke kërkuar zgjedhje të parakohshme dhe miratimin e ligjeve sociale. Opozita ka paralajmëruar vazhdimin e protestave edhe në javët në vijim.
Kosova dhe Kanadaja synojnë forcimin e marrëdhënieve bilaterale
Kryeministri në detyrë i Kosovës, Albin Kurti, u takua në Davos me ministrin kanadez Maninder Sidhu, ku u diskutua forcimi i marrëdhënieve bilaterale dhe bashkëpunimi ekonomik. Palët folën për tregtinë, industrinë minerare, infrastrukturën, teknologjinë e informacionit dhe mbrojtjen. Kurti falënderoi Kanadanë për mbështetjen ndaj Kosovës, për angazhimin në KFOR dhe përkrahjen në proceset ndërkombëtare.
Maqedonia e Veriut në Davos pret të tërheqë një numër të madh investimesh
Kryeministri i Maqedonisë së Veriut, Hristijan Mickoski, deklaroi se pret tërheqjen e investimeve të shumta gjatë Forumit Ekonomik Botëror në Davos, ku do të marrë pjesë me një delegacion qeveritar. Ai paralajmëroi pjesëmarrje në panele dhe takime bilaterale me kompani ndërkombëtare, duke shprehur pritshmëri për rezultate pozitive ekonomike. Në samit do të marrin pjesë qindra liderë botërorë dhe zyrtarë të lartë.
Zhduket një helikopter turistik me 3 persona pranë malit Aso në Japoni
Një helikopter u zhduk pranë majës së malit Aso në provincën Kumamoto të Japonisë jugperëndimore. Sipas autoriteteve, mjeti po kryente një fluturim turistik dhe besohet se mbante tre persona: dy pasagjerë nga Tajvani dhe një pilot. Ekipet e shpëtimit janë mobilizuar për kërkime, ndërsa detajet mbi fatin e helikopterit mbeten të paqarta.
Dhe kjo është përmbledhja e lajmeve të përditshme nga TRT Balkan. Për më shumë na ndiqni në TRT BALKAN ALBANIAN.