Сојузот на европските фудбалски федерации (УЕФА) ќе го тужи претседателот на ФИФА, Џани Инфантино, за „нелојално управување“ поради неговиот неуспешен план да го продаде Светското првенство на приватни инвеститори.

Управното тело на европскиот фудбал вели дека Инфантино „предизвикал директна и конкретна штета на угледот на ФИФА“ со својот неуспешен проект.

Во документ од 60 страници, до кој дојде АФП, УЕФА соопшти дека има намера да го тужи Инфантино за „нелојално управување“, кривично дело казниво со затвор до пет години.

Тужбата ќе биде поднесена во Швајцарија, каде што се наоѓа седиштето на ФИФА.

„УЕФА и други заинтересирани страни подготвуваат кривични пријави во Швајцарија против Инфантино, а потенцијално и против други службеници и советници на ФИФА. Обвиненијата ќе се базираат на обвиненија за недолично однесување согласно член 158 од швајцарскиот кривичен законик, со можност за додавање други или алтернативни обвиненија што можат да произлезат од собраните докази“, пишуваат медиумите.

Ова се однесува на тајно планирање и спроведување на трансакција што директно го оштети угледот на ФИФА, нејзините управувачки функции и деловните односи. Оваа трансакција беше на штета на самата организација и нејзините 211 членови, вклучувајќи 55 членови на УЕФА.

УЕФА го темели својот случај на планот на Инфантино да ги пласира приходите од Светското првенство во компанија отворена за приватни инвеститори, што ФИФА го претстави кон крајот на јули како начин за „отклучување на комерцијалниот потенцијал“ на своето водечко натпреварување.

За да се собере целата документација за планот, УЕФА веќе покрена постапка во Соединетите Американски Држави. Барањето е поднесено во Окружниот суд во Њујорк против банката ЏП Moрган и против планираниот главен инвеститор, Трајв Капитал, и неговиот извршен директор Џошуа Кушнер, брат на Џаред Кушнер, зет на Доналд Трамп.

За УЕФА, „ова всушност беше средство дизајнирано да им овозможи на Инфантино и „мал круг блиски соработници“ - вклучувајќи го и Џошуа Кушнер, зет на Доналд Трамп - „да стекнат траен удел и да профитираат од највредните средства на ФИФА, на штета на ФИФА, нејзините членови и други засегнати страни во фудбалското семејство“.

Во своето барање, европското тело се потпира особено на критиките од Карлос Кордеиро, инвестициски банкар кој стана советник на Џани Инфантино, кој поднесе оставка откако го опиша договорот како „лош бизнис за фудбалот“.