Американскиот претседател Доналд Трамп денеска изјави дека сериозно размислува за рестартирање на големи борбени операции против Иран, вклучително и напади што би биле пообемни од оние извршени за време на операцијата „Епски бес“.

Во интервју за „Аксиос“, Трамп рече дека е „блиску до донесување одлука“, но дека сè уште не ја донел.

„Размислувам за масовен напад. Поголем од кога било досега. Блиску сум до донесување одлука. Подготвени сме за тоа“, рече Трамп.

Тој не наведе кога ќе донесе конечна одлука, а двајца американски функционери потврдија за американскиот портал дека таква одлука сè уште не е донесена и дека не се издадени нови наредби до армијата.

Трамп рече дека Израел ќе се придружи за две минути доколку биде побарано, но додаде дека на Соединетите Држави не им е потребна ничија помош за да започнат нова операција против Иран.

Во исто време, тој предупреди дека учеството на Израел ќе има „последици“, алудирајќи, како што наведува порталот, на можноста за иранска одмазда против таа земја.

Зборувајќи за можноста за преговори, Трамп оцени дека Иран „сака да преговара“, но дека во моментов не е подготвен да постигне договор.

„Тие сè уште не претрпеле доволно болка“, рече американскиот претседател.

Два регионални извори запознаени со напорите за посредништво рекоа дека раководството на Иран не го прифатило последниот предлог што му е презентиран.

„Се обидуваме, но Иранците не покажуваат подготвеност за соработка“, рече еден од изворите.

Според Аксиос, САД ги засилија нападите во последните 12 дена за да ги спречат иранските акции против трговските бродови во Ормутскиот теснец.

Сепак, Иран не покажа подготвеност да го промени курсот и дополнително ги интензивираше воените активности во регионот.

Бунтовната група Хути во Јемен, поддржана од Иран, почна да напаѓа саудиски бродови во Црвеното Море, дополнително зголемувајќи ги тензиите на уште една клучна транспортна рута за нафта и зголемувајќи ја нестабилноста на глобалниот енергетски пазар, според американскиот портал.

Трамп рече на својата социјална мрежа Truth Social дека ако Хутите повторно нападнат бродови во Црвеното Море, „Соединетите Американски Држави ќе го сметаат Иран за одговорен“.

Тој оцени дека Хутите се ирански посредници и предупреди дека „Иран, како и самите Хути, ќе биде цел на силен воен одговор“.