Канада од 8 септември ќе воведе царини од 15 до 50 отсто за повеќе од 700 американски производи, во обид да ги изедначи своите царини со американските - соопштија канадските претставници.

Канада особено ќе ги зголеми царините за американскиот челик и алуминиум од 25 на 50 отсто, изедначувајќи ги со царините од 50 отсто што САД веќе ги воведоа за канадскиот челик и алуминиум пред најновиот круг американски царини.

Канадските власти ја претставија мерката како начин за заштита на домашното производство.

Царините што САД неодамна ги воведоа за канадските производи „ќе имаат реални последици за канадските работници, бизниси и заедници низ целата наша земја“, изјави канадскиот министер Франсоа-Филип Шампањ на прес-конференцијата во вторникот.

„Канада мора да одговори, а денеска тоа го правиме на пропорционален, насочен и стратешки начин“, додаде тој.

Овие возвратни царини се само дел од мерките со кои располага Канада во сè поголемата трговска војна со САД. Освен царините, Канада има и други инструменти, меѓу кои и ограничување на извозот на клучни производи во САД.

Покрај челикот и алуминиумот, возвратните царини главно се однесуваат на сектори како што се производството на хартија, градежните материјали, апаратите за домаќинство и земјоделските производи, вклучително млечните производи и морските плодови, објави Си-Ен-Ен.

Според американските податоци за трговијата, најновите американски царини опфаќаат околу пет отсто од стоките што САД минатата година ги увезле од Канада, додека канадските царини опфаќаат околу шест отсто од стоките што САД ги извезле во Канада.

Канада е втор најголем извозен пазар за американските производи и е меѓу главните дестинации за голем број стоки опфатени со новите увозни царини.

Канада минатата година беше најголем извозен пазар за американските апарати за домаќинство, купувајќи производи во вредност од над една милијарда долари, од кои повеќето сега ќе бидат оптоварени со царина од 25 отсто.

При најавувањето на возвратните мерки, канадските власти претставија и пакет-помош вреден 7,5 милијарди канадски долари (околу 5,4 милијарди американски долари) за поддршка на домашните компании погодени од новите царини.

Ризикот за Американците е во тоа што високите канадски царини би можеле да ја намалат побарувачката за овие производи, што би можело да ги принуди работодавачите да ги намалат работните часови или, во некои случаи, да отпуштаат работници.

Американскиот претседател Доналд Трамп веќе сигнализираше дека би можел да отиде чекор понатаму од најновите царини во трговскиот спор со Канада, заканувајќи се дека царините за канадските автомобили и автомобилски делови ќе ги зголеми на 50 отсто од 1 јануари.

„Ако Трамп ги спроведе повисоките царини за автомобилите или го ескалира спорот на друг начин, Отава би можела да употреби други мерки. Канада би можела да го ограничува извозот во САД на клучни производи, како што се енергенсите и калиумовите ѓубрива“, изјави Дајмонд Изингер, стратешки советник за политики и поранешен специјален советник за односите меѓу Канада и САД.

Друг ранлив сектор е електричната енергија. Премиерот на Онтарио, Даг Форд, во интервју објавено вчера изјави дека Канада треба да биде подготвена да го прекине извозот на електрична енергија кон САД доколку трговската војна се влоши, со што на маса би се ставила потенцијално моќна мерка. Онтарио снабдува со електрична енергија неколку американски сојузни држави, меѓу кои Њујорк, Мичиген и Минесота. Канадски претставници порачаа дека во однос на ова прашање „ништо не е исклучено“.