Бензините од полноќ поевтинуваат за пет денари за литар, додека цената на дизелот останува непроменета. Ова го одлучи Регулаторната комисија за енергетика, со што цените на нафтените деривати во просек се намалуваат за 1,89 проценти.
Од вторник, 27 октомври, ЕУРОСУПЕР БС-95 ќе се продава по највисока цена од 91 денар за литар, наместо досегашните 96 денари. ЕУРОСУПЕР БС-98 поевтинува од 98 на 93 денари, додека цената на ЕУРОДИЗЕЛ останува непроменета- 99 денари за литар.
Со претходната одлука, од 19 октомври, цената на бензините беше намалена за 2,5 денари, а со најновата следува дополнително намалување од пет денари. Така, за само две недели бензините кумулативно поевтинија за 7,5 денари по литар.
Дизелот, пак, минатата недела поскапе за два денари, а сега неговата цена останува непроменета.
Во формирањето на цените и понатаму се применуваат намалената акциза од четири денари по литар за бензините и дизелот, како и повластената стапка на ДДВ од 10 проценти за дизелот, кои беа опфатени и со претходната одлука.
Промена има и кај горивата што се користат за греење и во индустријата. Екстра лесното масло за домаќинство поевтинува за половина денар, од 110,50 на 110 денари за литар. Наспроти тоа, мазутот поскапува за 0,694 денари по килограм и неговата нова цена изнесува 54,273 денари.
Според образложението на Регулаторната комисија за енергетика, новите цени се резултат на движењата на референтните цени на нафтените деривати на светските пазари и промените на девизниот курс.
Во споредба со претходната пресметка, референтните цени на бензините на светскиот пазар се намалиле во просек за 8,12%, односно за 98,65 долари по тон.
Кај дизел-горивото е забележано благо зголемување од 0,404%, додека кај екстра лесното масло за домаќинство намалувањето изнесува 0,074%.
Кај мазутот, пак, референтните цени се зголемиле за приближно 2,06%.
Дополнително влијание врз пресметката имало и движењето на девизниот курс. Просечниот курс на американскиот долар во анализираниот период изнесувал 54,8974 денари, што е за околу 0,33% пониско во споредба со курсот користен во претходната пресметка од 19 октомври.
