Почна европската воена мисија на Гренланд, стигнаа првите војници од Франција

Првите војници од европските земји пристигнаа во Гренланд по изјавата на американскиот претседател Доналд Трамп дека има намера да го придружи островот кон Соединетите Американски Држави, објавува германскиот „Билд“.

Воен транспортен авион на данската армија слета синоќа на аеродромот во главниот град на Гренланд, Нук, а во него имаше не само дански војници, туку и претставници на француските вооружени сили.

Министерството за одбрана во Берлин објави дека денес испраќа 13 војници во Гренланд на извидувачка мисија, која треба да трае до 17 јануари.

Како што беше објавено, германските војници одат во Гренланд на покана на Данска, а тие ќе бидат префрлени во градот Нук со транспортен авион „Ербас Е400М“.

Во соопштението се наведува дека целта е да се „истражи можен воен придонес што би ја поддржал Данска во обезбедувањето безбедност во регионот“.

„На покана на Данска, Германија ќе учествува во истражување на Гренланд од 15 до 17 јануари 2026 година, заедно со други европски земји. Целта е да се истражи рамката за можни воени придонеси за поддршка на Данска во обезбедувањето на безбедноста во регионот, на пример во однос на капацитетите за поморски надзор“, се вели во соопштението на германското Министерство за одбрана.

Според информациите на Билд, операцијата е координирана од Копенхаген, а не преку структурите на НАТО, бидејќи нордиските земји кои се членки на алијансата, вклучувајќи го и Гренланд, се под команда на седиштето на НАТО во Норфолк, во САД, но операцијата се одвива без учество на Соединетите Американски Држави.

Медиумите известуваат дека војници од Холандија, Канада, Шведска, Велика Британија и Норвешка се исто така на пат кон Гренланд.

Шведскиот премиер Улф Кристерсон вчера во објава на платформата X објави дека првите шведски војници се на пат кон Гренланд и дека заедно со војници од група сојузнички земји „заедно ќе ги подготват следните чекори во рамките на данската вежба „Операција Арктичка издржливост““.

Тој истакна дека „Шведска испраќа персонал од своите вооружени сили на барање на Данска“.

Францускиот амбасадор за поларни и океански прашања, Оливие Поавр д’Арвор, претходно изјави за Франсинфо дека „околу 15 француски војници, специјалисти за високи планини“ веќе се распоредени во градот Нук, во Гренланд.

Американскиот претседател Доналд Трамп во последните недели постојано објавуваше дека има намера да ја преземе контролата врз Гренланд, поради безбедносни проблеми на Арктикот, односно поради наводната закана од Русија и Кина, а Владата на САД не ја исклучи можноста за присилно преземање на островот.

Средбата на претставниците на Данска, Гренланд и САД во Вашингтон вчера покажа дека Данска и САД имаат „различни ставови“ по ова прашање, изјави данскиот министер за надворешни работи Ларс Локе Расмусен по состанокот.

На состанокот беше договорено да се формира работна група на високо ниво, со цел да се испита дали може да се најде заеднички пристап по прашањето на Гренланд.

Германската влада претходно ги отфрли американските претензии кон Гренланд, кој е автономна данска територија, но канцеларот Фридрих Мерц и министерот за одбрана Борис Писториус изјавија дека сакаат да соработуваат со САД за да го обезбедат арктичкиот регион од руската закана.

Мерк нагласи дека ова треба да се направи во рамките на НАТО.

Данска објави дека ќе го прошири своето воено присуство во Гренланд, додека Франција објави дека планира да отвори конзулат.