Единици на либанската армија денес почнале да се распоредуваат во јужниот либански град Завтар ал-Гарбија по повлекувањето на израелските сили од областа, изјавил висок либански безбедносен функционер.

Распоредувањето се спроведува како дел од планот, посредуван од САД, либанската армија да ја преземе контролата врз делови од јужен Либан и да конфискува оружје од Хезболах, група поврзана со Иран, додека израелските сили постепено се повлекуваат, објави Ројтерс.

Израелската армија вчера објави дека започнала со спроведување на таканаречената „пилот зонска програма“, а предавањето на контролата врз Завтар ел-Гарбија е првиот тест на тој план.

Либан се надева дека спроведувањето на договорот ќе овозможи враќање на државната контрола врз област длабока околу 10 километри, која сè уште е под контрола на израелските сили.

Според либанските власти, десетици села во областа биле уништени, а јавната инфраструктура, вклучувајќи болници, електрани и водни пумпи, била сериозно оштетена.

Десетици илјади жители сè уште не се во можност да се вратат во своите домови.

Либанската армија соопшти дека нејзините единици започнале со распоредување во Завтар ел-Гарбие, во областа Набатие, и ги повика жителите да не се враќаат во градот сè додека не се стабилизира безбедносната ситуација.

Израелски воен претставник изјави дека пилот-програмата е тест за суверенитетот на Либанските вооружени сили како единствена официјална институција овластена да носи оружје во областа.

Израелските претставници изразија сомнежи во способноста на Либан целосно да го разоружа Хезболах, но го гледаат договорот постигнат минатиот месец како важен чекор кон долгорочен мир со Либан.