Хрватското Министерство за здравство донесе одлука според која граѓаните на трети земји под визен режим, при продолжување на привремениот престој во Република Хрватска, ќе мора да се подложат на здравствен преглед за откривање на акутни и хронични заразни болести и, доколку е потребно, ќе бидат вакцинирани.

Одлуката е донесена за заштита на интересите на јавното здравство, а се однесува на граѓаните на земјите на кои им е потребна виза за влез во Хрватска, односно Шенген зоната.

Меѓу нив, на пример, се државјани на Индија, Непал, Бангладеш, Пакистан, Филипините и Египет кои имаат одобрена дозвола за привремен престој во Хрватска и бараат нејзино продолжување.

Прегледите ќе се спроведуваат врз основа на упатствата издадени од работодавачот.

Одлуката се однесува и на дополнителна вакцинација на граѓани на трети земји под 35 години кои немаат доказ за пропишана вакцинација против мали сипаници, детска парализа, дифтерија и тетанус.

Граѓаните на трети земји вработени во здравството и системот за здравствена и социјална заштита треба да бидат вакцинирани и против хепатитис Б, пишува загрепски „Јутарњи лист“.

Трошоците за здравствениот преглед на странските работници ќе ги сносат работодавачите, додека трошоците за преглед на други државјани на трети земји кои го продолжуваат својот привремен престој ќе ги сносат самите.

Трошоците за вакцинација ќе ги финансира Хрватскиот институт за здравствено осигурување.