Косово е подготвено за следната фаза од својот европски пат, изјави претседателката Вјоса Османи во среда по состанокот со специјалниот претставник на Европската Унија за дијалог, Питер Соренсен.

Османи објавидека на состанокот се разговарало за процесот на европска интеграција на Косово, дијалогот со Србија и регионалните безбедносни прашања.

Претседателката на Косово изјави дека Приштина, по укинувањето на она што таа го нарече неправедни мерки, е подготвена тесно да соработува со европските партнери со цел решително да се движи кон добивање статус на кандидат за членство во Европската Унија.

Специјалниот претставник на Европската Унија (ЕУ) за дијалогот Косово-Србија, Питер Соренсен, претходно во Приштина изјави дека очекува брзо да се конституира косовското собрание и да се формира нова влада, по парламентарните избори одржани на 28 декември минатата година.

„Високата претставничка ги посети и Белград и Приштина минатата година. Таму имавме ветувања дека ќе има состанок, кога ќе биде вистинско време. Таа ќе го свика состанокот, страните ќе учествуваат, а потоа ќе видиме како ќе се развиваат работите. Но, тоа останува да се види“, рече Соренсен во Приштина.

Во текот на 2025 година во Брисел се одржаа неколку рунди разговори во рамките на дијалогот Белград-Приштина.