Романија во вторник соопшти дека „можни остатоци од дрон“ се пронајдени во близина на нејзината југоисточна граница, по руските напади врз украинските пристаништа на реката Дунав во текот на ноќта.

Според Министерството за одбрана, пријавен бил пад на дрон во областа Гринду во југоисточниот регион Тулча, во близина на Дунав, околу пет километри јужно од границата.

„Тимови составени од воен персонал излегоа на местото на настанот и пријавија присуство на можни фрагменти од дрон. Областа е обезбедена и истрагата ќе продолжи во раните утрински часови“, се вели во соопштението.

Министерството соопшти дека неговите радари откриле групи дронови во близина на романскиот воздушен простор, што довело до превентивно активирање на системите за воздушна одбрана.

„Временските услови на југоистокот од земјата го спречија полетувањето на авионите што извршуваат мисии за воздушна полиција“, додаде.

Министерката за надворешни работи Оана Тоиу на социјална мрежа X го опиша нападот како неодговорен и со последици врз романската почва.

„Овие акции се дел од низа слични инциденти и претставуваат јасен модел во руската агресивна војна. Тие следат по систематски руски провокации против ЕУ и НАТО. Нема да се двоумиме да ја зголемиме цената што Русија ја плаќа за вакви неодговорни и нелегални акции“, рече Тоиу.

Таа, исто така, посочи на „значајното влијание“ на неодамна воведените санкции од ЕУ и САД и потврди дека се во тек подготовки за нови санкции и дополнителни мерки.