Црногорскиот претседател Јаков Милатовиќ во среда изјави дека европскиот пат на Црна Гора не смее да се користи за решавање на билатерални прашања на сметка на националните интереси и нагласи дека црногорската влада сноси целосна одговорност за преговорите со Хрватска.

Одговарајќи на прашања од новинари во Херцег Нови, каде што беше по повод Денот на општината, Милатовиќ рече дека не е вклучен во преговорите со Хрватска.

Тој изрази очекување дека црногорската влада и Министерството за надворешни работи ќе ги земат предвид националните интереси во овој процес, соопшти неговиот кабинет.

„Претседателот на државата не е вклучен во преговорите и во таа смисла, секако, верувам дека целосната одговорност е на Владата на Црна Гора. Верувам, се надевам дека Владата на Црна Гора и Министерството за надворешни работи ги водат овие преговори на најдобар можен начин, секогаш имајќи предвид што е државен, национален интерес на Црна Гора“, рече Милатовиќ.

Коментирајќи ги изјавите што доаѓаат од Хрватска, особено од хрватскиот министер за надворешни работи, Милатовиќ оцени дека тие честопати не се во духот на добрите односи меѓу двете земји.

„Црна Гора е земја што сака најдобри можни односи со Република Хрватска, но секако не смееме да дојдеме до ситуација каде што ќе го изгубиме нашето национално достоинство како резултат на исходот од овие преговори“, нагласи тој.

Најголемиот бран на негодување во последно време беше предизвикан од изјавата на хрватскиот шеф на дипломатијата, Гордан Грлиќ Радман, дека Хрватска го бара имотот на поранешна СФРЈ што завршил во Црна Гора, чија вредност се проценува на над 2,7 милијарди долари.

Милатовиќ смета дека одредени отворени прашања меѓу двете земји не се составен дел од европската интеграција на Црна Гора и дека европскиот пат не треба да се користи за решавање на билатерални спорови.

„Нашата цел е јасна: сакаме да станеме следната членка на Европската Унија. Верувам дека договорот за пристапување на Црна Гора треба да се потпише некаде напролет или лето следната година. И верувам дека членството на Црна Гора во ЕУ што е можно поскоро е во интерес и на Република Хрватска“, рече Милатовиќ.

Милатовиќ се осврна на прашањето за спомен-плочата во поранешниот логор Мориња, оценувајќи дека таа е поставена нелегално и дека последователните одлуки на црногорските институции го легализирале таквото однесување.

„Владата на Црна Гора и Парламентот, со донесување закон, а подоцна и со одлука на Владата на Црна Гора, легализирале нелегален чин“, рече тој.

Црногорската влада минатата недела објави дека донела одлуки за промена на името на градскиот базен во Котор и последователно одобрување на спомен-плоча во поранешниот логор Морињ, со што направила чекор кон решавање на две отворени билатерални прашања што ги оптоваруваа односите меѓу Загреб и Подгорица во последните години.

Загреб неодамна побара од Црна Гора да реши осум отворени прашања, од кои повеќето се наследство од војната во 1990-тите, пред влезот на земјата во Европската Унија.

Зборувајќи за демаркацијата, Милатовиќ истакна дека морската граница е тесно поврзана со копнената граница и предупреди дека Црна Гора не треба да ја ослабува својата позиција во евентуални арбитражни постапки со прифаќање на одредени барања.

„Не би сакал некој од Владата на Црна Гора или од парламентарното мнозинство да ги валка своите биографии на сметка на државните интереси, на истиот начин како што ги валкаа оние од ДПС претходно“, рече Милатовиќ.

Тој нагласи дека Црна Гора сака добри односи со сите свои соседи, но дека не сака да биде искористена за остварување на туѓи надворешнополитички интереси.

„Ниту Република Србија, ниту Република Хрватска. Црна Гора е Црна Гора, ние имаме наши државни интереси и сакаме најдобри можни односи со сите, но имаме и наше државно достоинство“, рече тој.