Комесарката за проширување на Европската унија, Марта Кос, изјави во вторник дека Украина нема да стане членка на Европската Унија до почетокот на 2027 година.

„Мислам дека сите во оваа просторија знаат дека е невозможно Украина да стане членка на ЕУ на 1 јануари 2027 година“, рече таа на настан организиран од „Политико“.

Украинскиот претседател Володимир Зеленски промовираше забрзан распоред, но Кос нагласи дека процесот на пристапување во ЕУ реално не може да се врзе со фиксни рокови.

„Можам да разберам зошто претседателот Зеленски го спомена овој датум. Тој знае дека во блиска иднина Украина нема да може да стане членка на НАТО, па затоа бара безбедносни гаранции“, рече таа.

Таа додаде дека процесите на проширување историски биле успешни кога следеле јасна низа.

„Прво ви е потребен мир, тоа е важно, а потоа треба да спроведете реформи. Инвеститорите ќе дојдат, знаете, во Украина, само ако можат прво да заработат пари и ако нивните инвестиции се безбедни“, рече таа.

Сепак, Кос нагласи дека сегашната методологија за проширување на ЕУ е дизајнирана за мирновременски услови, каде што кандидатите имаат доволно време да спроведат реформи, што укажува дека процесот можеби ќе треба да се прилагоди на сегашната геополитичка ситуација.

Европската комисија им претстави три опции на земјите-членки за реформирање на процесот на проширување, додаде таа, нагласувајќи дека секој напредок зависи од нивната одлука.

„Без одлука од земјите-членки, не можеме да продолжиме“, рече таа.

Иако одржувањето на статус кво не се смета за одржливо, Кос ги отфрли порадикалните промени, посочувајќи наместо тоа на засилена постепена интеграција како најверојатен пат напред.

„Овој пристап би им овозможил на земјите-кандидати постепено да интегрираат одредени политики на ЕУ и да добијат одредени бенефиции пред да постигнат полноправно членство“, објасни таа.

За Исланд, Кос рече дека патот на островската земја кон членство во ЕУ навистина би можел да се движи брзо ако одлучи да ги продолжи преговорите за пристапување, со оглед на нејзината постоечка интеграција преку Европската економска зона и Шенген.

Референдумот, кој се очекува подоцна оваа година во Исланд, ќе утврди дали преговорите ќе бидат обновени, додаде таа.