Силни експлозии, проследени со звуци што наликуваа на прелетување на авиони, беа слушнати во Каракас околу 2:00 часот по полноќ (06:00 по Гринич) во саботата, јави агенцијата Франс Прес (АФП).

Експлозиите се случија во време кога американскиот претседател Доналд Трамп, кој распореди поморска борбена група во Карибите, ја отвори можноста за копнени напади врз Венецуела.

Звуци од експлозии сè уште се слушале околу 2:15 часот, иако нивната точна локација не била позната.

Трамп во понеделникот изјави дека Соединетите Американски Држави погодиле и уништиле пристанишна зона за наводни венецуелски бродови за шверц на дрога.

Републиканскиот лидер не прецизираше дали станувало збор за воена или операција на ЦИА, ниту каде точно се случил нападот, наведувајќи само дека бил „долж брегот“.

Наводниот напад би бил првиот познат копнен удар на венецуелска територија.

Претседателот Николас Мадуро ниту го потврди ниту го демантираше нападот од понеделникот, но во четвртокот изјави дека е отворен за соработка со Вашингтон по неколкунеделниот американски воен притисок.

Администрацијата на Трамп го обвинува Мадуро дека предводи наркокартел и тврди дека спроведува жестока акција против трговијата со дрога, но левичарскиот лидер ги негира сите обвинувања, велејќи дека Вашингтон се обидува да го собори од власт бидејќи Венецуела ги има најголемите познати резерви на нафта во светот.

Вашингтон го зголеми притисокот врз Каракас со неформално затворање на венецуелскиот воздушен простор, воведување дополнителни санкции и наредби за заплена на танкери натоварени со венецуелска нафта.

Со недели, Трамп се закануваше со копнени напади врз наркокартелите во регионот, наведувајќи дека тие ќе започнат „наскоро“, при што понеделникот беше првиот очигледен пример.

Американските сили, исто така, од септември наваму извршиле бројни напади врз пловни објекти и во Карипското Море и во источниот дел на Тихиот Океан, таргетирајќи, според Вашингтон, шверцери на дрога.

Сепак, администрацијата не обезбеди докази дека целните пловни објекти биле вклучени во трговија со дрога, што отвори дебата за законитоста на овие операции.

Според информациите објавени од американската војска, смртоносната поморска кампања досега однела најмалку 107 животи во најмалку 30 напади.