Украина соопшти дека нејзините одбранбени сили не насочиле беспилотни летала кон Бугарија или кон која било друга партнерска земја.

Бугарската министерка за надворешни работи Велислава Петрова се сретна со украинската амбасадорка Олесја Илашчук поради беспилотното летало кое во саботата навлегло во бугарскиот воздушен простор и експлодирало во близина на Трансбалканскиот гасовод, недалеку од границата со Романија.

Илашчук изјави дека тековната војна на Русија против Украина е „главната причина“ за инцидентот, информираат од Амбасадата на Украина во Бугарија.

„Украинските одбранбени сили не насочија беспилотни летала кон Бугарија, ниту кон која било друга партнерска земја“, изјави Илашчук, додавајќи дека Киев е „целосно отворен“ за соработка во истрагата.

Илашчук истакна дека интензивирањето на руските напади врз цивили и цивилната инфраструктура во Украина претставува директна закана за соседните земји.

Таа додаде дека што поскоро завршување на војната е од клучно значење за регионалната безбедност и ја повика меѓународната заедница да изврши поголем притисок врз Кремљ за постигнување мир.

Изразувајќи сериозна загриженост поради инцидентот, Петрова нагласи дека секое неовластено навлегување во бугарскиот воздушен простор е неприфатливо.

Петрова побара од Украина да ги достави сите достапни информации што би можеле да помогнат во расветлувањето на инцидентот и повика на преземање мерки за спречување слични случаи, како и на воспоставување директни и ефикасни комуникациски канали меѓу надлежните органи на двете земји, се наведува во соопштението.

Двете страни се согласиле да одржуваат блиска координација во текот на истрагата.

Началникот на бугарската одбрана Емил Ефтимов вчера изјави дека беспилотното летало можеби било пренасочено поради електронско војување и дека властите не веруваат оти инцидентот бил намерна акција против Бугарија.

Бугарските власти соопштија дека се верува оти беспилотното летало припаѓало на украинската армија.