Израелската Влада го одобри договорот за прекин на огнот во Газа

Израелската Влада го одобри договорот за прекин на војната во Газа и размена на затвореници со палестинските фракции, соопшти рано утринава Кабинетот на премиерот Бенјамин Нетанјаху.

Соопштението е објавено откако Кабинетот одржа состанок на кој се гласаше за договорот за прекин на огнот и ослободување на заложниците во Појасот Газа.

Според израелскиот јавен радиодифузен сервис КАН, официјалното одобрување значи дека договорот за прекин на огнот ќе стапи на сила веднаш.

Американскиот претседател Доналд Трамп во средата објави дека Израел и палестинската група Хамас постигнале договор за првата фаза од неговиот план за прекин на огнот и размена на затвореници.

Договорот беше постигнат по четиридневни индиректни преговори меѓу двете страни во египетскиот град Шарм ел-Шеик, со учество на делегации од Турција, Египет и Катар, а под надзор на САД.

Сите министри гласаа за договорот освен петмина, меѓу кои министерот за национална безбедност Итамар Бен-Гвир и министерот за финансии Безалел Смотрич.

КАН забележа дека сите министри што се спротивставија на договорот се од партиите Еврејска моќ и Религиозен ционизам предводени од Бен-Гвир и Смотрич.

Со одобрувањето на договорот, во следните 24 часа ќе стапи на сила прекин на огнот во Газа, а израелската армија ќе се повлече кон „жолтата линија“. Потоа Хамас е должен да ги ослободи сите живи затвореници во рок од 72 часа, според КАН.

Одобрувањето на Владата, исто така, претставува зелено светло израелската армија да започне постепено повлекување од Појасот Газа.

На 29 септември американскиот претседател Доналд Трамп претстави план за прекин на огнот од 20 точки за Газа, кој вклучува ослободување на сите заробени Израелци во замена за околу 2.000 палестински затвореници, траен прекин на огнот и постепено повлекување на израелските сили од целиот Појас Газа.

Втората фаза од планот повикува на воспоставување нов механизам за управување во Газа без Хамас, формирање безбедносни сили составени од Палестинци и војници од арапски и исламски земји, како и разоружување на Хамас. Исто така, се повикува на арапско и исламско финансирање на новата администрација и обнова на енклавата.

Арапските и муслиманските земји го поздравија планот, но некои официјални лица, исто така, рекоа дека за многу детали треба да се дискутира и да се преговара за целосно спроведување.

Од октомври 2023 година во израелските напади убиени се речиси 67.200 Палестинци во енклавата, повеќето од нив жени и деца, и ја направија несоодветна за живеење.