Иранската револуционерна гарда (ИРЦГ) денес објави дека Ормускиот теснец, еден од најважните морски премини во светот, каде што сообраќајот речиси е замрен од почетокот на американско-израелската војна со Иран, е затворен само за бродови од Соединетите Американски Држави, Израел, Европа и други западни сојузници.

„Претходно рековме дека, во согласност со меѓународното право и резолуциите, Исламската Република Иран ќе има право да го контролира преминот низ Ормускиот теснец во време на војна“, соопшти Корпусот на исламската револуционерна гарда, објави ИРИБ ТВ.

ИРЦГ предупреди дека доколку бродови што им припаѓаат на САД, Израел, Европа и нивните поддржувачи се појават во областа, тие сигурно ќе бидат цел.

Ормускиот теснец е практично затворен откако САД и Израел започнаа заедничка операција против Иран во саботата, што ги зголеми цените на нафтата и се заканува да ја наруши глобалната економија, според американската телевизиска мрежа.

Претседателот на САД Доналд Трамп вчера изјави дека американската морнарица би можела да ги придружува танкерите за нафта низ Ормускиот теснец ако е потребно и му нареди на Вашингтон да обезбеди гаранции за осигурување за бродовите што го поминуваат низ Заливот.

„Американската морнарица ќе ги придружува танкерите низ Ормускиот теснец штом ќе може“, изјави денеска министерот за енергетика на САД, Крис Рајт.