Набљудувачи со виолетови елеци ќе ги следат агентите на ИЦЕ во Њујорк
Набљудувачите ќе бидат волонтери од канцеларија на главната обвинителка на Њујорк, Летиција Џејм собучени да набљудуваат, но не и да се мешаат во тоа дали спроведувањето на законите за имиграција од страна на Трамп е во рамките на законот
Државата Њујорк составува тим од правни набљудувачи кои ќе носат виолетови елеци и ќе ги следат и снимаат службениците за спроведување на имиграцијата, изјави во вторникот главната обвинителка на Њујорк, Летиција Џејмс.
Овој потег доаѓа како одговор на неодамнешните насилни немири во Минеаполис, каде што американскиот претседател Доналд Трамп распореди илјадници вооружени и маскирани агенти на Службата за имиграција и царина (ИЦЕ) додека се обидува да депортира повеќе мигранти од кој било од неговите претходници.
Џејмс изјави дека набљудувачите ќе бидат волонтери од нејзината канцеларија, обучени да набљудуваат, но не и да се мешаат во тоа дали спроведувањето на законите за имиграција од страна на Трамп е „во рамките на законот“.
„Горда сум што ги штитам уставните права на жителите на Њујорк слободно да зборуваат, мирно да протестираат и да го живеат својот живот без страв од незаконски федерални дејствија“, рече Џејмс, која е член на Демократската партија.
Според неа, во Минесота се видело колку брзо и трагично федералните операции можат да ескалираат во отсуство на транспарентност и одговорност.
Министерството за внатрешна безбедност на САД, кое го надгледува ИЦЕ, изјави дека Џејмс ги става луѓето од државата Њујорк во опасност со тоа што не соработува со Службата.
„Агентите на ИЦЕ немаше да мора да бидат на терен во Њујорк доколку имаше државна и локална соработка“, изјави Триша Меклафлин, портпаролка на Министерството за внатрешна безбедност.
Трамп тврди дека депортирањето на многу мигранти, вклучително и оние кои се легално во САД, е неопходно за намалување на криминалот, иако неговиот аргумент честопати е побиен од податоците за криминалот.
Во јануари, федералните службеници во Минеаполис, во услови на агресивна примена на законите за депортација, убија двајца американски државјани - Рене Гуд и Алекс Прети.
Демократските лидери во Минесота, Илиноис и Калифорнија ја обвинија администрацијата на Трамп дека отишла предалеку и ги кршела уставните права и на мигрантите и на американските граѓани, вклучително и нивните права да ги набљудуваат и да протестираат против владините активности.