Најмалку 2.571 лице загинале во протестите во Иран, соопшти во среда група за човекови права со седиште во САД, додека религиозните лидери на Исламската Република се соочуваат со најголемиот бран на незадоволство во последниве години.
Групата соопшти дека ја потврдила смртта на 2.403 демонстранти, 147 личности поврзани со владата, 12 лица под 18 години и девет цивили кои не биле демонстранти.
Ирански функционер изјави во вторник дека околу 2.000 луѓе се убиени, што е прв пат властите да објават број на жртви во повеќе од две недели немири низ целата земја.
Немирите, поттикнати од тешките економски услови, претставуваат најголем внатрешен предизвик за владетелите на Иран во последните најмалку три години и доаѓаат во време на интензивирање на меѓународниот притисок по израелските и американските напади минатата година.
Иранскиот престолонаследник Реза Пахлави, чие враќање го бараат иранските демонстранти, во интервју за Фокс њуз изјави дека се надева дека американскиот претседател Доналд Трамп ќе го исполни своето ветување за поддршка. Тој не сакаше да коментира за наводите за приватна средба со американскиот претставник Стив Виткоф во Белата куќа.
Иран, пак, го обвини американскиот претседател Доналд Трамп доцна во вторникот за поттикнување политичка нестабилност и насилство и за загрозување на суверенитетот, територијалниот интегритет и националната безбедност на земјата.
„Соединетите Американски Држави и израелскиот режим носат директна и неоспорна правна одговорност за загубата на невини цивилни животи, особено меѓу младите“, напиша иранскиот амбасадор во ОН, Амир Саеид Иравани во писмо, кое беше испратено и до генералниот секретар на ОН, Антонио Гутереш.
Тој го напиша писмото како одговор на објавата на Доналд Трамп на социјалните мрежи претходно во вторникот.
Трамп ги повика Иранците да продолжат да протестираат и, без да даде детали, рече дека „помошта доаѓа“ додека властите го интензивираат своето задушување на најголемите протести во последниве години.
Постојат стравувања дека бројките се многу поголеми, бидејќи информациите тешко се добиваат поради блокадата на интернетот и медиумите.
Уапсени се повеќе од 10.000 луѓе. Особено загрижувачки е случајот со 26-годишниот Ерфан Солтани, чија јавна егзекуција со бесење - според неговото семејство - би можела да се случи уште денес.
Откако ги откажа сите средби со иранските претставници и им кажа на демонстрантите дека помошта е на пат и да се продолжи борбата, американскиот претседател Доналд Трамп издаде предупредување до Техеран.
„Ако направат нешто такво, ќе преземеме многу силни мерки. Крајот на сè ќе биде победа. Ми се допаѓа победата. Не сакаме она што се случува во Иран. И, знаете, ако сакаат протести, тоа е едно, но кога убиваат илјадници луѓе, сега зборуваат за бесење - ќе видиме како ќе постапат. Нема да помине добро“, се закани Трамп.
