Денес, Кина ја отфрли одлуката на Вашингтон да ги прогласи Конфучиевите институти за закана по националната безбедност на САД, нарекувајќи го тој потег „оцрнување“.

„Го отфрламе оцрнувањето и клеветите насочени против Конфучиевите институти“, изјави за новинарите во Пекинг портпаролот на Министерството за надворешни работи, Гуо Џиакун.

„Образовната размена и соработката меѓу Кина и САД помагаат во зајакнувањето на меѓусебното разбирање меѓу народите на двете земји. Тие се посакувани од двете страни, носат придобивки за двете страни и не треба да бидат попречувани или нарушувани“, додаде тој.

Минатата недела, Стејт департментот на САД ги прогласи Конфучиевите институти, кои функционираат на американските универзитети и кампуси, за закана по националната безбедност на САД.

Американскиот секретар за одбрана, Пит Хегсет, во видео објавено на социјалните мрежи, тврдеше дека Конфучиевите институти дејствуваат прикриено на американските универзитети и дека Пентагон ги вклучил во својата листа на институции што ја загрозуваат националната безбедност на Вашингтон.

„Излегува дека се појавиле 80 нови пропагандни ќелии на 30 универзитети, кои користат различни имиња и различни статути, но имаат иста мисија: да украдат интелектуална сопственост и да извршат инфилтрација во умовите на американските студенти“, рече Хегсет.

Овие институти, кои го носат името на древниот кинески филозоф Конфучие, претставуваат кинески јавни програми за промовирање на образованието и културата.