Европската Унија предложи клауд услугите на Амазон и Мајкрософт да бидат опфатени со строгите правила на Законот за дигитални пазари (ДMA).

Тоа би ги подложило најголемите светски компании кои нудат услуги на пресметување во облак (cloud computing) на дополнителни регулаторни обврски, објави Ројтерс.

Европската комисија верува дека Амазон Веб Сервиси и Мајкрософт Азуре имаат значителна пазарна моќ и клучна улога во европската дигитална економија, поради што треба да бидат назначени како „чувари на портите“ според правилата на ЕУ.

Доколку одлуката биде потврдена, компаниите ќе мора да овозможат поголема интероперабилност и преносливост на податоци, како и да се придржуваат кон забраните за фаворизирање на сопствените услуги.

Амазон и Мајкрософт ги отфрлија некои од обвинувањата од европските регулатори, предупредувајќи дека дополнителните правила би можеле да влијаат на конкуренцијата и инвестициите во Европа.

Конечната одлука на Европската комисија се очекува во наредните месеци.