Американскиот претседател Доналд Трамп денеска ги поврза широко распространетите немири во Франција со имиграциските политики, повикувајќи ги француските власти веднаш да ги затворат националните граници.

„Мигрантите ја презедоа Франција. Тие мора брзо да ги затворат границите“, напиша Трамп на својата платформа за социјални медиуми Truth Social.

Изјавата следеше по забелешките вчера во кои американскиот лидер тврдеше дека миграцијата „ја разбила таа некогаш голема земја“, повикувајќи го Париз да ја врати контролата „пред да биде предоцна“.

Демонстрациите низ Франција започнаа кон средината на септември како студентски протести поради недостигот на наставници и недоволно финансираните училишта, пред да се прошират во национални синдикални штрајкови против инфлацијата и високите трошоци за живот.

Немирите ескалираа во текот на викендот, при што неколку згради беа запалени, вклучувајќи ја и историската градска куќа во Лимож. Речиси 1.000 припадници на обезбедувањето беа повредени, според Министерството за внатрешни работи.

Повеќе од 2.330 луѓе беа приведени во полиција низ цела Франција во текот на викендот, изјави во понеделник министерот за правда, Џералд Дарманин.

Вчера, претседателот Емануел Макрон го осуди она што го нарече „неограничено насилство“ од страна на „бунтовнички елементи од радикални левичарски групи, придружени од бројни криминалци“. Тој ги разликуваше одговорните од демонстрантите со легитимни барања.

Премиерот Себастијан Лекорну изјави во денеска дека им наложил на регионалните власти да воведат ограничен, локален полициски час за да се спречат понатамошни немири и грабежи.