Венецуелската опозициска лидерка Мачадо му го врачи на Трамп Нобеловиот медал за мир
Медалот може да ги смени сопствениците, но титулата на добитник на Нобелова награда за мир не може, таа не може да се поништи, сподели или пренесе на други. одлуката е конечна и важи за сите времиња, објави норвешкиот Нобелов комитет
Венецуелскиот опозициски лидер Марија Корина Мачадо изјави дека таа лично му го „врачила“ на американскиот претседател Доналд Трамп својот Нобелов медал за мир за време на нивната средба во Белата куќа.
„Му го кажав следново: пред 200 години, генералот [маркиз де] Лафајет му подари на Симон Боливар медал со ликот на Џорџ Вашингтон. Боливар го задржа тој медал до крајот на својот живот“, им рече Мачадо на новинарите во четврток.
Венецуелката ја доби престижната награда, иако Трамп и некои светски лидери се залагаа тој да ја добие Нобеловата награда за мир, па откако остана со празни раце американскиот претседател изрази негодување.
Трамп напиша во објава на социјалните мрежи дека Мачадо му ја доделила нејзината награда „за неговата работа“. „Толку прекрасен гест на меѓусебно почитување. Ти благодарам, Марија“.
„Генералот Лафајет му го додели како знак на братството меѓу народот на САД и народот на Венецуела во нивната борба против тиранијата. По 200 години историја, народот на Боливар му враќа на наследникот на Џорџ Вашингтон медал, во овој случај медал од Нобеловата награда за мир“, продолжи таа.
Мачадо се сретна со американскиот лидер во она што Белата куќа го нарече позитивни разговори, и покрај тоа што американскиот претседател ја „тргна“ настрана.
Откако го киднапираше венецуелскиот лидер Николас Мадуро, Трамп рече дека Мачадо нема поддршка од народот на земјата богата со нафта и наместо тоа ја поддржа заменичката на Мадуро, Делси Родригез.
Откако се сретна со Трамп, Мачадо, која со години водеше кампања за ставање крај на владеењето на Мадуро, се сретна со радосните поддржувачи пред Белата куќа.
Откако Мачадо му го врачи медалот на Трамп, норвешкиот Нобелов комитет изјави дека наградата не може да се пренесе на други.
„Откако ќе се објави Нобелова награда, таа не може да се поништи, сподели или пренесе на други. Одлуката е конечна и важи за сите времиња“, се вели во објава на X.
„Медалот може да ги смени сопствениците, но титулата на добитник на Нобелова награда за мир не може.“