Десетици загинати во бродска несреќа со илегални мигранти покрај Либија

Меѓународната организација за миграција (ИОМ) соопшти дека 53 нелегални мигранти, меѓу кои и две бебиња, се мртви или исчезнати откако гумен чамец се преврте покрај брегот на Либија.

Бродот, кој превезувал 55 мигранти, се превртел северно од Зувара, Либија, во петокот, а само две Нигеријки биле спасени за време на операцијата за пребарување и спасување на либиските власти, соопшти портпаролот на агенцијата на ОН.

Според соопштението, една преживеана пријавила дека го загубила сопругот, додека другата рекла дека ги загубила своите две бебиња во трагедијата.

„ИОМ жали за загубата на животи во уште еден смртоносен инцидент по должината на Централномедитеранската рута“, се вели во соопштението, додавајќи дека екипите на агенцијата им пружиле итна медицинска помош на двајцата преживеани по слетувањето, во координација со надлежните органи.

Според исказите на преживеаните, бродот - кој превезувал мигранти и бегалци од африкански националности - отпловил од Ал-Завија, Либија, околу 23:00 часот на 5 февруари, а се превртел приближно шест часа подоцна.

Податоците на ИОМ покажуваат дека само во јануари, најмалку 375 мигранти биле пријавени како мртви или исчезнати по повеќекратни „невидливи“ бродоломи во Централниот Медитеран поради екстремни временски услови, а се верува дека стотици други смртни случаи се неевидентирани.

Според Проектот за исчезнати мигранти на ИОМ, повеќе од 1.300 мигранти исчезнале во Централниот Медитеран во 2025 година.

Во меѓувреме, најновиот инцидент го зголемува бројот на мигранти пријавени како мртви или исчезнати на рутата во 2026 година на најмалку 484.