Русија ја забрани популарната детска платформа Roblox поради несоодветни содржини
Според регулаторот, мониторингот открил содржина што вклучувала повици за насилство, симулации на терористички напади и материјал поврзан со ЛГБТ, што е забрането според рускиот закон
Роскомнадзор, руската федерална агенција за следење, контрола и цензура на масовните медиуми и интернетот го блокираше пристапот до американската платформа за онлајн игри Roblox.
Агенцијата како причина за тоа го наведе постојаното циркулирање на материјали што промовираат или оправдуваат екстремистички и терористички активности.
Се вели дека таквата содржина продолжила да се појавува и покрај претходните предупредувања упатени до Roblox Corporation.
Според регулаторот, мониторингот открил содржина што вклучувала повици за насилство, симулации на терористички напади и материјал поврзан со ЛГБТ, што е забрането според рускиот закон.
Додадено е дека внатрешниот систем за модерација на Roblox постојано не успева да обезбеди безбедна средина за корисниците, особено малолетниците.
Агенцијата, исто така, посочи на извештаи за сексуално вознемирување во кое учествуваат деца и сценарија што ги охрабруваат малолетниците да се вклучат во незаконски или насилни дејствија.
Роскомнадзор потврди дека испратил повеќе известувања до Роблокс барајќи отстранување на забранетата содржина пред да го блокира пристапот.