Москва и Киев во текот на ноќта разменија напади, при што во Украина биле повредени 12 лица, а на двете страни е предизвикана материјална штета.

Во Киев, во рускиот напад со беспилотни летала биле повредени пет лица, меѓу кои три деца, соопшти шефот на Градската воена управа, Тимур Ткаченко, на Телеграм. Тој додаде дека една приватна куќа била целосно уништена, а друга била оштетена.

Во регионот Харков, три лица биле повредени во серијата руски напади, при што биле оштетени станбени објекти, помошни објекти и едно возило, соопшти регионалното обвинителство на Телеграм.

Во рускиот напад врз трговски центар во Запорожје било повредено едно лице и избувнал пожар, соопшти украинското Министерство за внатрешни работи на Телеграм. Подоцна спасувачите го изгаснале пожарот.

Три лица биле повредени во украинскиот регион Одеса, каде што руските сили извршиле „масовен напад“ врз цивилната инфраструктура, оштетувајќи станбени подрачја, објект на една компанија, резервоари за складирање и магацини, соопшти регионалниот гувернер Олех Кипер на Телеграм.

Украинските воздухопловни сили на Телеграм соопштија дека нивната противвоздушна одбрана соборила или неутрализирала 69 руски беспилотни летала, како и три дрона „Бандерол“ и „Дан-Т“.

Во Русија, градоначалникот на Москва, Сергеј Собјанин, на Телеграм соопшти дека повеќе од 350 украински беспилотни летала се упатиле кон Московскиот Регион, при што повеќето биле уништени на далечина, а 64 биле пресретнати при приближувањето кон главниот град.

Во Ростовскиот Регион паднатите остатоци од беспилотни летала оштетија станбени згради и приватни автомобили, соопшти регионалниот гувернер Јури Сљусар на Телеграм.

Руското Министерство за одбрана соопшти дека нејзините сили пресретнале и уништиле 629 украински беспилотни летала со фиксни крила над територијата на Русија, анектираниот Крим и Азовското и Црното Море.

Утринава Русите започнаа со тридневното гласање на изборите за избор на 450 члена на Државната дума, долниот дом на Парламентот, паралелно со регионалните и локалните избори.

Со гласањето ќе се избере деветтиот состав на Државната дума и тоа се први национални парламентарни избори во Русија откако започна војната во Украина во февруари 2022 година.

Независната проверка на тврдењата на двете страни е отежната поради тековната војна.