Претседателката на Европската комисија, Урсула фон дер Лајен, денес на средбата со сириското раководство за време на нејзината посета на Дамаск вети целосна поддршка од Европа за закрепнувањето и обновата на Сирија.
„По децении страв и молк Сиријците започнаа долго патување кон надеж и обнова. Европа ќе направи сè што може за да ги поддржи закрепнувањето и обновата на Сирија“, напиша Фон дер Лајен на американската платформа за социјални медиуми X.
Претседателот на Европскиот совет, Антонио Коста, кој ја придружуваше Фон дер Лајен на средбата со сириските претставници, меѓу кои и со претседателот Ахмед ал-Шара, изјави дека посетата на ЕУ покажува „континуирана поддршка за сирискиот народ“.
„По многу години војна и страдање, падот на режимот на Ал-Асад конечно му донесе надеж на сирискиот народ. Сè уште има долг пат пред вас, но веќе ги направивте првите чекори“, рече тој.
Посетата следува по зголемениот ангажман на ЕУ со новото раководство на Сирија. Во јуни 2025 година комесарката на ЕУ за Медитеранот, Дубравка Шуица, ја посети Сирија и изјави дека блокот сака да ја види земјата стабилна и просперитетна под нејзината нова власт.
Шефицата за надворешна политика на ЕУ, Каја Калас, во мај, исто така, објави укинување на економските санкции воведени за поранешниот режим.
Башар ал-Асад, лидер на Сирија речиси 25 години, избега во Русија, со што заврши режимот на партијата Баас, која беше на власт од 1963 година. Во јануари 2025 година беше формирана нова преодна администрација предводена од Ал-Шара.
