Серхио Бускетс, долгогодишниот фудбалер и капитен на Барселона, ќе го напушти шпанскиот фудбалски тим на крајот на сезоната, потврди денес 34-годишниот играч.

„Дојде време да објавам дека ова ќе биде мојата последна сезона со Барса“, рече Бускетс во емотивното видео на Твитер објавено од клубот.

„Поминав незаборавно патување. Уште како дете доаѓајќи на натпреварите или гледајќи ги на телевизија, секогаш сонував да играм со овој дрес и на овој стадион. Реалноста ги надмина сите мои соништа“, рече тој.

Бускетс додаде дека му било „чест, сон, извор на гордост“ да игра за Барселона толку многу години, но дека не била лесна одлуката да го напушти клубот од детството.

Бускетс, инаку фудбалер на Барселона од 2008 година, им се заблагодари на сите, особено на своите соиграчи од клубот за нивниот придонес и поддршка.

Неговиот договор со клубот завршува во јуни.

Тој се приклучи на Барселона во 2005 година за да игра за младинскиот тим на шпанскиот клуб. Потоа во 2008 година Бускетс влезе во сениорскиот тим Барселона Б.

Тој одигра 718 натпревари во дресот на Барселона, и постигна 18 гола и 40 асистенции, со што е трет на вечната листа на Барселона.

Тој е еден од најодликуваните фудбалери на Барселона со 31 титула.

Бускетс ѝ помогна на Барселона да освои осум титули во шпанската Ла Лига, седум трофеи во Копа дел Реј, седум шпански Суперкупа, три титули во Лигата на шампиони на УЕФА, три Суперкупа на УЕФА и три Светски клупски првенства на ФИФА.