Генералниот секретар на Обединетите нации, Антонио Гутереш, по веста за смртта на воениот злосторник Ратко Младиќ, изрази солидарност со жртвите, преживеаните и нивните семејства кои претрпеа злосторства за кои беше прогласен за виновен поранешниот командант на Војската на Република Српска.

Потсетувајќи дека Младиќ ја издржуваше казната доживотен затвор откако Меѓународниот кривичен трибунал за поранешна Југославија во 2017 година го осуди за геноцид, злосторства против човештвото и кршење на законите и обичаите на војувањето, пресуда што беше потврдена од Жалбениот совет на Меѓународниот резидуален механизам за кривични трибунали на 8 јуни 2021 година, Гутереш изрази солидарност со жртвите, преживеаните и нивните семејства.

„Овие судски наоди се конечни, а фактите што со нив се конечно утврдени се дел од историскиот запис. Генералниот секретар го повторува својот повик до сите што се на позиции на моќ да се воздржат од негирање на сериозноста на пресудените злосторства“, се наведува во соопштението на портпаролот на ОН, Стефан Дужарик.

Генералниот секретар на ОН „остро го осудува секое негирање на геноцидот во Сребреница како историски настан, како и сите дејствија со кои се величаат оние што меѓународните судови ги осудиле за воени злосторства, злосторства против човештвото и геноцид“.

„Одговорноста останува клучен чекор кон траен мир, доверба и помирување во регионот. Обединетите нации остануваат целосно посветени на поддршката на напорите насочени кон постигнување одговорност и правда за сите“, се наведува во соопштението објавено во четвртокот.

Воениот злосторник Ратко Младиќ

Поранешниот командант на Војската на Република Српска и осуден воен злосторник Ратко Младиќ почина во затворската единица во Хаг на 84-годишна возраст.

Информацијата за смртта на воениот злосторник Младиќ во четвртокот ја потврди и неговото семејство.

Смртта на Младиќ доаѓа по повеќемесечно влошување на неговата здравствена состојба. Неговите адвокати тврдеа дека неговата здравствена состојба е „напредната и неповратна“ и побараа негово привремено ослободување.

Меѓународниот резидуален механизам за кривични трибунали (IRMCT) во повеќе наврати го одби тоа барање. Претседателката на Механизмот, Грасиела Гати Сантана, вчера порача дека здравствената состојба сама по себе не претставува доволна основа за предвремено ослободување.

Младиќ на 22 ноември 2017 година пред Меѓународниот кривичен трибунал за поранешна Југославија (МКТЈ) во првостепена постапка беше осуден на доживотна казна затвор.

Жалбениот совет на Меѓународниот резидуален механизам за кривични трибунали на 8 јуни 2021 година ја изрече конечната пресуда со која Младиќ беше осуден на доживотна казна затвор.

Со првостепената пресуда на Меѓународниот кривичен трибунал за поранешна Југославија (МКТЈ), Младиќ беше осуден на доживотен затвор за геноцидот во Сребреница, злосторства против човештвото во 15 општини во Босна и Херцеговина, опсадата, снајперското дејствување и тероризирањето на граѓаните на Сараево од 1992 до 1995 година, како и за држење припадници на мировната мисија на ОН како заложници.

Судскиот совет утврди дека Младиќ ги извршил овие злосторства во водечка улога со цел трајно да се отстранат муслиманите и Хрватите во периодот од мај до ноември 1995 година, како и босанските муслимани во Сребреница да бидат елиминирани преку убивање на мажи и момчиња и присилно одведување на жени, деца и дел од постарите мажи.

Младиќ е исто така виновен за злосторствата на истребување и убиства кои биле дел од целите на трите здружени злосторнички потфати за кои бил обвинет: „отстранување на несрпското население од подрачјата на кои Србите полагале право, ширење терор меѓу цивилното население во Сараево и спроведување кампања на снајперско дејствување и гранатирање; елиминација на босанските муслимани од Сребреница, како и присилно одведување на жени, деца и дел од постарите мажи“.

Судот наведе дека е утврдено дека е виновен и за депортации и нехумани дела. Оваа точка од обвинението вклучува апсења без налог, мачење, убиства, силувања, уништување куќи, споменици на културата и верски објекти.

Младиќ е виновен и за тероризирање и противправни напади врз Сараево. Од април 1992 година до крајот на војната, Сараево беше гранатирано и под снајперски оган. Се наведува дека биле убиени илјадници цивили од сите возрасти и дека Младиќ бил учесник во овој здружен злосторнички потфат со цел ширење терор меѓу цивилите во Сараево. Виновен е и за земање припадници на Обединетите нации како заложници.

Судскиот совет го ослободил Младиќ само по точка 1, како што било случај и со првостепената пресуда која се однесува на обвинението за геноцид во Приједор, Сански Мост, Котор Варош, Клуч, Власеница и Фоча.

Од правдата се криеше 16 години, а беше уапсен во Србија во 2011 година.