Шпанскиот фудбалски експерт Чаби Алонсо (44) и Реал Мадрид постигнаа меѓусебен договор за раскинување на договорот, објави Кралскиот клуб. Кратко потоа, Алваро Арбелоа беше назначен за нов тренер.
Алонсо пристигна на Сантијаго Бернабеу минатото лето од Баер Леверкузен и заминува по само 28 натпревари на чело на клубот, во кои оствари 20 победи.
„Реал Мадрид сака да објави дека, со меѓусебен договор меѓу клубот и Чаби Алонсо, е одлучено да го заврши својот мандат како тренер на првиот тим. Алонсо секогаш ќе ја носи наклонетоста и восхитот на сите Мадридисти бидејќи е легенда на Реал Мадрид и секогаш ги претставувал вредностите на нашиот клуб. Реал Мадрид секогаш ќе биде негов дом“, објави клубот.
Алонсо го напушта Реал само 24 часа по поразот од Барселона во финалето на шпанскиот Суперкуп.
По натпреварот, Алонсо го намали значењето на поразот, велејќи дека станува збор за финале во она што го нарече најмалку важно натпреварување, сугерирајќи дека поразот немал преголема тежина, што предизвика низа критики кај навивачите на „Лос Бланкос“.
Барса, исто така, е на чело на лигата со четири бода предност пред Реал, додека „Кралскиот клуб“ моментално е на седмото место во Лигата на шампионите со 12 бода, шест зад лидерот Арсенал.
Арбеола доаѓа на чело на Реал само неколку месеци откако го презеде Б тимот, оставајќи ја Кастиља на четвртото место во третата дивизија.
Тој ја започна својата тренерска кариера во септември 2020 година преземајќи го тимот до 14 години, а две години подоцна стана тренер на тимот до 19 години.
Како играч, Арбелоа беше дел од Реал Мадрид во еден од најуспешните периоди во неговата историја. Тој го носеше дресот на Реал помеѓу 2009 и 2016 година, играјќи 238 официјални натпревари.
Во тој период, тој освои осум трофеи - две Лиги на шампиони, едно Светско клупско првенство, еден Суперкуп на УЕФА, една титула во Ла Лига, два трофеи во Копа дел Реј и еден шпански Суперкуп.
Со шпанската репрезентација, тој го освои Светското првенство во Јужна Африка во 2010 година и две Европски првенства (2008, 2012). Вкупно, одигра 56 натпревари за „Бесните“.
Арбеола ќе го има своето деби во Албасете во среда во Копа дел Реј.
