Вршителот на должност премиер на Косово Албин Курти ја потврди пораната испорака на борбените дронови „Skydagger“, кои се дел од договорот со турскиот Бајкар, потпишан минатата година.

„Контејнери со илјадници борбени дронови Skydagger камикази стигнаа на Меѓународниот аеродром во Приштина „Адем Јашари“ “, објави Курти на социјалната мрежа Фејсбук.

Тој рече дека „десетици војници на КБС веќе се обучени за нивна употреба“.

Договорот, како што наведе, е потпишан во декември минатата година со познатата турска компанија Бајкар, која е матична компанија на произведувачот „Skydagger“

„Дроновите Skydagger требаа да стигнат во јануари 2026 година, но ги примивме три месеци претходно“, рече Курти, наведувајќи дека „овие дронови камикази, познати и како RTF (Ready to Fly) Skydagger FpV, борбените дронови опремени со експлозивни напави за да погодат подвижни и статични непријателски цели“. 

„Со купувањето на овој контигент на беспилотни летала, покрај авионот ТБ2 Бајрактар и Пума, продолжуваме да ја зголемуваме и подобруваме ударната моќ на нашата војска со цел изградба на способна и кохерентна сила со новите технолошки достигнувања и современите тактики на војување“, порача Курти.

Дроновите се натоварени на мултифункционалните камиони Rheinmetall 8x8 кои Косово ги набави минатата година, вкупно 15, од кои 10 се купени, а пет стигнаа преку донација.