Северна Македонија и Косово имаат цел да ја зајакнат институционалната соработка и да ја зголемат трговската размена на земјоделски и прехранбени производи, беше истакнато на средбата на министерот за земјоделство, шумарство и водостопанство Борче Серафимовски со косовскиот колега Арменд Муја.
Според соопштение на Министерството за земјоделство, шумарство и водостопанство, двајцата министри ја нагласија важноста на редовната комуникација и координација меѓу надлежните институции, усогласувањето со стандардите на Европската Унија и размената на искуства во процесот на европската интеграција.
Серафимовски истакна дека близината на пазарите и земјоделскиот потенцијал создаваат можности за продлабочување на економските односи преку посилна институционална соработка, зголемување на трговската размена и создавање долгорочни партнерства меѓу производителите и компаниите.
Муја ја нагласи потребата од систематски пристап во билатералната соработка, со редовни институционални контакти и јасни канали на комуникација, особено во областа на безбедноста на храната, сертификатите и стандардите.
На средбата се разговараше и за трговијата со млеко и млечни производи. Заменик-министерот Албрим Хоџа истакна дека прашањата поврзани со безбедноста на храната треба да се разгледуваат врз основа на целосна документација, лабораториски резултати и континуирана комуникација меѓу надлежните институции.
На средбата присуствуваа и директорот на Агенцијата за храна и ветеринарство, Оливер Миланов и директорот на Државниот инспекторат за земјоделство, Ивица Ангеловски.
