Белорускиот претседател Александар Лукашенко во вторникот изјави дека неговата земја и Иран мора да соработуваат против нападите на Западот во услови на растечки тензии во светот.

„Ситуацијата во светот се вжештува, а кризата на Блискиот Исток придонесува за фактот непријателските западни земји, предводени од САД, постојано да го насочуваат копјето на овој конфликт против Иран“, рече Лукашенко за време на состанокот со иранскиот прв вице-премиер Мохамад Мохбер во Минск, се вели во соопштението на белоруското претседателство.

„Мораме поблиску да соработуваме едни со други, да соработуваме за да се спротивставиме на овие напади“, рече Лукашенко.

Белорускиот претседател потсети и на неговата посета на Техеран претходно оваа година во март, каде што тој и неговиот ирански колега Ебрахим Раиси се согласија да ја развијат трговската и билатералната соработка.

„Врз основа на искуството од односите со Иран, врз основа на долгогодишната соработка со Иран, заклучувам дека нашите бирократии мора да научат да работат многу брзо. Ако се договориме за нешто, тоа мора да се исполни навреме. За нас не се најважни санкциите и притисокот, туку времето. И во никој случај не треба да се изгуби ова време како резултат на бирократски пречки“, додаде Лукашенко.

Сојузникот на Русија, Белорусија е погодена од западните санкции поради нејзината поддршка за Москва откако таа започна „специјална воена операција“ во Украина во февруари 2022 година.